Վերամուտը Հալէպի Ազգ. Միացեալ Վարժարանէն ներս

0

Այսօր առաւօտ, Հալէպի Ազգ. Միացեալ վարժարանի աշակերտները վերամուտը դիմաւորեցին Տնօրէնութեան նախաձեռնած գեղարուեստական ձեռնարկով:

Ազգ. Միացեալ վարժարանի աշակերտութեան վերամուտը շնորհաւորելու եկած էին Բերիոյ Հայոց Թեմի Առաջնորդը, Ազգ. Վարչութեան եւ Ուսումնական Խորհուրդի ներկայացուցիչները, թեմիս Քահանայից Դասը, վարժարանի Տնօրէնութիւնն ու Հոգաբարձութիւնը:

Հայերէնաւանդ ուսուցչուհի Մարալ Ապլաքեան գեղարուեստական յայտագիրը բաց յայտարարելով բացման խօսք արտասանեց: Այնուհետեւ ան բեմ հրաւիրեց վարժարանի առաջին կարգի աշակերտները ու բարի գալուստ մաղթեց անոնց:
Ապա աշակերտները անակնկալ այցելուներ ունեցան:

Ազգ. Միացեալ վարժարանի աշակերտութեան վերամուտը շնորհաւորելու եկած էր մանկական երգերու մեկնաբան Սոնան եւ «Գանձասար» պաշտօնաթերթի մանկապատանեկան բաժինի հերոսը՝ Կկուն: Սոնան ու Կկուն զրուցեցին, երգեցին, հայերէն թերթ կարդալու կարեւորութիւնը շեշտեցին ու վերամուտի յատուկ «Կկու»ի թիւ մը նուիրեցին բոլոր աշակերտներուն:
Վարժարանի տնօրէնուհի Զեփիւռ Է. Րէիսեան բարի գալուստ մաղթեց աշակերտութեան, ոյժ ու կորով ուսուցչական կազմին եւ հոգաբարձութեան:

Յայտագիրը շարունակուեցաւ աշակերտական ելոյթներով:
Օրուան խորհուրդը փոխանցեց Բերիոյ Հայոց Թեմի Առաջնորդ Գերշ. Տէր Շահան Սրբ. Արք. Սարգիսեան, որ լուսարձակի տակ առաւ գիտութեան արժէքը, մայրենիի պահպանման կարեւորութիւնն ու հայ աշակերտին տիպարը:

Ձեռնարկը աւարտին հասաւ Սրբազան Հօր եւ Քահանայից Դասուն Տէրունական աղօթքով:

Մանրամասնութիւնները՝ «Գանձասար»ի Սեպտեմբեր Բ. համարով:

Share.

Leave A Reply