ՀՅԴ-ն Դէմ Պիտի Քուէարկէ Եւրասիական Տնտեսական Միութենէն Դուրս Գալու «Ելք»-ի Առաջարկին

0

Հայ Յեղափոխական Դաշնակցութիւնը դէմ պիտի քուէարկէ «Ելք»  խմբակցութեան կողմէ Ազգային ժողովին ներկայացուած Եւրասիական տնտեսական միութենէն դուրս գալու մասին նախագիծին, «Թերթ»-ին հետ զրոյցի մը ընթացքին ըսաւ ՀՅԴ Բիւրոյի քաղաքական ներկայացուցիչ, Ազգային Ժողովի ՀՅԴ խմբակցութեան ղեկավար Արմէն Ռուստամեան:

«Խաղ ու պար չէ` այսօր մտնել վաղը դուրս գալ… Հայաստանը լուրջ քայլ կատարած է, Եւրասիական տնտեսական միութիւնը մեզի համար ապահոված է կայուն, խաղաղ զարգանալու կարելիութիւն եւ միջավայր: Մենք ուրիշ այլընտրանք` մեր անվտանգութեան հետ կապուած հարցերը  ապահովելու համար, դժբախտաբար, չունինք», ըսաւ Ա. Ռուստամեան:

Ըստ պատգամաւորին, Հայաստանը յաջողած է «ե՛ւ-ե՛ւ» քաղաքականութեան մէջ` ըլլալով Եւրասիական տնտեսական միութեան անդամ կարելիութիւն ունի Եւրոպական Միութեան հետ համապարփակ համագործակցութեան:

«Նոյնիսկ Եւրոպական Միութիւնը հասկցած է, որ այդպիսի պահանջներ դնելը յանգեցուցած է շատ լուրջ հարցերու, նոյնիսկ Եւրոպական Միութեան հեղինակութեան խնդիր յառաջացած է: Մենք տեսանք, թէ  իրենց քաղաքականութիւնը Ուքրանիոյ եւ այլ տեղերու մէջ ինչի յանգեցուց: Հիմա, երբ Եւրոպական Միութիւնը վերանայած է իր մօտեցումը, մենք պէտք է ատկէ օգտուինք: Այն, ինչ որ չենք կրնար լուծել Եւրոպական Միութեան հետ կապուած, պէտք է լուծենք Եւրասիական Տնտեսական Միութեան մէջ, իսկ այն, ինչ որ չենք կրնար լուծել Եւրասիական Տնտեսական Միութեան մէջ, պիտի լուծենք Եւրոպական Միութեան մէջ», ըսաւ Ռուստամեան:

Պատասխանելով այն հարցումին, թէ ի՞նչն է, որ Հայաստանը այս տարիներուն ընթացքին կրցած է  լուծել Եւրասիական Տնտեսական Միութեան մէջ, Արմէն Ռուստամեան նշեց, որ ինք այս մարզին մասնագէտը չէ, պէտք է հաշուետուութիւն ներկայացնել, քննարկել տող առ տող:

Անդրադառնալով այն դիտարկումին, թէ «Ելք»-ը իր ներկայացուցած նախագիծին մէջ թուարկած է ձախողութիւնները, Արմէն Ռուստամեան ըսաւ, որ ատիկա իրեն համար բաւարար չէ, թէեւ կ՛ընդունի` կան հարցեր, որոնք Հայաստանը լիարժէք չէ կրցած օգտագործել:

«Հարցը պէտք է անգամ մը եւս քննուի, հասկնանք, թէ Եւրոպական Միութեան կողմէ տրամադրուած նոր կարելիութիւնը ի՛նչ դռներ կը բանայ մեզի համար, լիարժէք օգտագործենք ի շահ մեր պետութեան»,  նշեց ան:

Պատասխանելով «Եւրասիական Տնտեսական Միութիւնը ի՞նչ տուած է  Հայաստանին անվտանգութեան ապահովման մարզին մէջ» հարցումին` Արմէն Ռուստամեան յայտնեց. «Պարզ չէ՞, որ մեր անվտանգութեան դիրքերը ամրապնդուած են: Մենք պատերազմին յաղթած ենք, որ բոլորովին վերջերս պարտադրուած էր մեզի Ատրպէյճանի կողմէ: Փաստը կը մնայ փաստ չէ՞, թէ մենք ինչ ուժով կրցած ենք յաղթել այդ պատերազմին: Ատիկա ակնյայտ փաստ է, չէ՞»:

Պատասխանելով այն հարցումին, թէ` «նկատի ունիք, որ ռուսական աջակցութեա՞մբ յաղթած ենք  ապրիլեան պատերազմին», ապա Արմէն Ռուստամեան նկատել տուաւ. «Հապա ինչո՞վ կռուած են մեր զինուորները: Դուք պարզապէս տեղեակ չէք հարցէն: Դուք կ՛երեւի տեղեակ չէք, թէ ի՛նչ կը նշանակէ  պաշտպանութիւն ըսուածը: Պաշտպանութիւնը ամբողջական համալիր է, ո՛չ միայն մարդիկն են կարեւոր, այլեւ` ատիկա զէնք զինամթերք ունենալու խնդիր է: Միջոցներ պէտք է ունենաս: Ասոր մասին է խօսքը»:

Share.

Leave A Reply