Հայաստան Եւ Իրան Կը Դիւրացնեն Փոխադարձ Առեւտուրն Ու Մաքսային Հսկողութիւնը

0

ԵՐԵՒԱՆ.- «Արմէնփրէս»ը կը տեղեկացնէ, թէ Հայաստանի Ազգային ժողովը քննարկած է Հայաստանի Հանրապետութեան կառավարութեան եւ Իրանի Իսլամական Հանրապետութեան կառավարութեան միջեւ Մեղրի-Նորտուզ սահմանային դարպասի համատեղ օգտագործման մասին համաձայնագիրը վաւերացնելու մասին Հայաստանի Հանրապետութեան օրէնքի նախագիծը:

Հայաստանի կառավարութեան առընթեր պետական եկամուտներու կոմիտէի նախագահի տեղակալ Վախթանգ Միրումեան կը յիշեցնէ, որ համաձայնագիրը ստորագրուած է 21 Դեկտեմբեր 2016-ին. անոր հիմնական նպատակը երկու երկիրներուն միջեւ փոխադարձ առեւտուրի դիւրացումն է եւ մաքսային հսկողութեան պարզացումը:

«Համատեղ դարպասի մեկնարկը եւ շահագործումը կը նշանակէ կրկնակի հսկողութեան եւ կրկնակի ընթացակարգերու վերացում: Համաձայնագիրին երկրորդ յօդուածը շատ յստակ կը նախատեսէ, թէ որոնք են այն գործողութիւնները, որոնցմով կը պարզացուի ապրանքներու փոխադրամիջոցներու եւ ուղեւորներու տեղափոխութիւնը», կ՛ընդգծէ Միրումեան:

ՊԵԿ-ի փոխնախագահը պարզաբանեց, որ ելքի երկրին մէջ յայտարարուած մաքսային յայտարարագիրին տուեալները հիմք պիտի հանդիսանան մուտքի երկրին մէջ ապրանքներու եւ փոխադրամիջոցներու յայտարարագրման համար: «Այստեղ մենք կը խուսափինք մաքսային արժէքի որոշման ընթացակարգերէն, համապատասխան հսկողութիւնը կը վերապահուի յայտարարագիրի առումով մուտքի երկրին, իսկ այդ մէկը պիտի իրականացուի ելեկտրոնային եղանակով: Մաքսային հսկողութիւնը նոյնպէս կ՛իրականացնէ մուտքի երկիրը:

Համաձայնագիրով նաեւ հնարաւորութիւն կայ, որ ելքի երկիրը իրականացնէ մաքսային հսկողութիւն, սակայն միայն այն պարագաներուն, երբ կայ անմիջական տեղեկատուութիւն մաքսային զննում իրականացնելու անհրաժեշտութեան վերաբերեալ, մանրամասնեց Վախթանգ Միրումեան:

Share.

Leave A Reply