Շարմազանովը` Ալիեւին . «Պատմական Տարածք Ունենալէ Առաջ Պէտք Է Պատմութիւն Ունենալ»

0

ՀՀ Ազգային Ժողովի փոխնախագահ Եդուարդ Շարմազանով խորհրդարանէն ներս լրագրողներու հետ զրոյցի մը ընթացքին մեկնաբանեց Իսլամական Համագործակցութեան Խորհրդաժողովի ընթացքին Ատրպէյճանի նախագահ Իլհամ Ալիեւի այն յայտարարութիւնը, թէ Լեռնային Ղարաբաղը պատմական Ատրպէյճանի տարածք է:

Շարմազանովի խօսքով, վերջին փտածութեան խայտառակութիւններէն ետք Ատրպէյճանի ղեկավարութիւնը, այդ երկրի նախագահին գլխաւորութեամբ, ջղաձգումներու մէջ է եւ կը փորձէ նոր հարթակներ գտնել իր սուտը տարածելու համար: «Պատմական տարածք ունենալէ առաջ պէտք է պատմութիւն ունենալ: Ատրպէյճանը ունի ընդամէնը 99 տարուան պատմութիւն: Համեմատութեան համար ըսեմ, որ յայտնի «Մանչեսթըր Իւնայթըտ»ը Ատրպէյճանէն 40 տարի մեծ է», ընդգծեց Շարմազանով:

Անդրադառնալով Ալիեւի Հայաստանին իսլամաֆոպիայի եւ մահմետական յուշարձանները ոչնչացնելու մէջ մեղադրող յայտարարութեան, Շարմազանով ընդգծեց, որ որեւէ ժողովրդավարական երկիր այդ առումով կրնայ վերցնել Հայաստանի փորձը:

Ան յայտնեց, որ Հայաստանի մէջ կ’ապրի ընդամէնը 2500 քիւրտ մահմետական, իսկ Հայաստանը նոր Սահմանադրութեամբ ընդամէնը 2500-նոց քրտական համայնքին տուած է Ազգային ժողովի պատգամաւոր ունենալու հնարաւորութիւն: «Եթէ ամբողջ աշխարհի մէջ այդպէս կը ճնշեն, ես կը փափաքէի, որ Ալիեւն ալ այդպէս «ճնշեր» իր ազգային փոքրամասնութիւններուն: Ասոնք հերթական ծիծաղելի եւ զաւեշտալի յայտարարութիւններ են, որոնք ցոյց կու տան, որ Ատրպէյճանի ղեկավարութիւնը կանգնած է ֆորս մաժորի առջեւ: Հրապարակումներ եղած են, որ Ատրպէյճանը աջակցած է ահաբեկչութեան, նաեւ արեւմտեան հեղինակաւոր շարք մը լրատուամիջոցներ փաստեր ներկայացուցած են Ատրպէյճանի մասնակցութեամբ փտածութեան խայտառակութիւններու մասին, ուստի Ատրպէյճանի ղեկավարութիւնը կը փորձէ շեղել սլաքները, բայց չի յաջողիր», ըսաւ ան:

Մեկնաբանելով Ատրպէյճանի նախագահի յայտարարութիւնը, թէ հայերը կ’ոչնչացնեն մահմետական յուշարձանները` Եդուարդ Շարմազանով յիշեցուց, որ Երեւանի կեդրոնը կը գտնուի Կապոյտ մզկիթը, որ Երեւանի խորհրդանիշներէն մէկն է: «Յուշարձաններու ոչնչացման մասին խօսելէ առաջ լաւ կ’ըլլար մեղր ուտել եւ յիշել… Նախիջեւանի մէջ անոնք ոչնչացուցած են տասնեակ հազարաւոր հայկական խաչքարեր», եզրափակեց Շարմազանով:

Share.

Leave A Reply