Տիգրան Գէորգեան. «Իմ պաշտօնավարման ընթացքում ես անձամբ տեսայ, թէ ինչ ծանրագոյն մարտահրաւէրների բախուեց հալէպահայութիւնը»

0

ՀՀ Հալէպի Գլխաւոր Հիւպատոս Տիգրան Գէորգեանի Հրաժեշտի Խօսքը Հալէպահայութեան

Իմ շատ սիրելի հալէպահայեր,

Այսօր ես աւարտում եմ իմ դիւանագիտական առաքելութիւնը Հալէպում։ Հեռանում եմ հակասական զգացողութիւններով. մի կողմից ուրախ եմ վերադառնալու Հայրենիք՝ դէպի ընտանիք և ընկերներ, միւս կողմից տխուր եմ, քանզի ունեմ բազում հաճելի յիշողութիւններ՝ կապուած Հալէպում անցկացրած տարիների հետ։ Միաժամանակ դժուար է բաժանուել հարազատ դարձած քաղաքից ու այստեղ բնակւող բազմաթիւ բարեկամներից, որոնց ես ձեռք բերեցի այս տարիների ընթացքում:

Իմ պաշտօնավարման ընթացքում ես անձամբ տեսայ, թէ ինչ ծանրագոյն մարտահրաւէրների բախուեց հալէպահայութիւնը։ Սիրիական հակամարտութիւնը կաթուածահար արեց հալէպահայութեան կեանքը, ցաւօք, ունեցանք զոհեր և վիրաւորներ, աւերուեցին հայկական եկեղեցիներ ու դպրոցներ, Հալէպի հայ համայնքը մեծ վնասներ կրեց, դարերի ընթացքում կառուցածը մի քանի տարում հաւասարուեց հողին։

Սակայն, հայի անկոտրում ոգին չընկրկեց, և յարաբերական ու փխրուն խաղաղութեան հաստատման հենց առաջին վայրկեանից հալէպահայութիւնը լծուեց հայ համայնքին նախկին փայլը վերադարձնելու գործին։

Պէտք է նշեմ, որ առնաձնակի հպարտ եմ, որ հենց ինձ բախտ վիճակուեց լինելու ձեր կողքին այդ դժուարին օրերին, ձեզ հետ միասին յաղթահարելու բազում դժուարութիւններ և համատեղ դնելու հալէպահայութեան բարեկեցիկ ապագայի մեր ունեցած տեսլականի հիմքերը։

Ցանկանում եմ իմ շնորհակալութեան և երախտիքի խօսքը յղել բոլոր այն մարդկանց, ովքեր իմ պաշտօնավարման ողջ ընթացքում կանգնած են եղել Հալէպում ՀՀ գլխաւոր հիւպատոսութեան կողքին և հայրենասիրական վեհ զգացումներով լցուած անշահախնդիր կերպով օժանդակել են հիւպատոսութեան բնականոն աշխատանքի ապահովմանը։

Անչափ ուրախ եմ, որ Հալէպից հեռանալիս մարդկանց բնակարանները 7 տարուայ ընդմիջումից յետոյ կրկին լոյսերով ողողուած եմ տեսնում։ Տա Աստուած, որ լոյսն ու յոյսը երբեք չլքեն ձեզ, իմ սիրելի հալէպահայեր։

Յիշէք, որ ի դէմս ինձ Հայաստանում ունէք շատ լաւ մի բարեկամ։

Միշտ ձեր՝ 
Տիգրան Գէորգեան

Share.

Leave A Reply