Լափշին Ազատ Արձակուած Է

0

Պլոկըր Ալեքսանտր Լափշինի  փաստաբան Էդուարդ Չեռնինը «ՌԻԱ Նովոսթի»-ին յայտնած է, որ Ատրպէյճանի նախագահին կողմէ ներում ստացած պլոկըրը ազատ արձակուած է:

Ան ատրպէյճանական ԱՓԱ լրատու գործակալութեան հետ զրոյցի մը ընթացքին յայտնած է, թէ Լափշինի մայրը կը պատրաստուի մեկնիլ Պաքու, այդ պատճառով ալ կը յետաձգուի պլոկըրին տեղափոխումը Իսրայէլ:

«Անոր մայրը` Պելա Լափշինան կ՛ուզէ այստեղ գալ, հետեւաբար մենք պէտք է սպասենք: Լափշինին Իսրայէլ պիտի ուղարկեն 1-2 օրէն», յայտնած է փաստաբանը:

Ան նաեւ նշած է, որ ներկայիս հիւանդանոց գտնուող Լափշինի առողջական վիճակը բնական է:

Լափշին ձերբակալուած էր 2016-ին Պիելոռուսիոյ մէջ` Ատրպէյճանի դիմումին համաձայն: Պաքու պլոկըրը «սեւ ցուցակ»-ի վրայ առած էր` առանց արտօնութեան Արցախ այցելելուն պատճառով: Լափշին 7 Փետրուար 2017-ին յատուկ թռիչքով տեղափոխուած էր Մինսքէն Պաքու` պետական անվտանգութեան ծառայութեան աշխատակիցներուն ուղեկցութեամբ:

Պաքուի ծանր յանցագործութիւնները քննող դատարանը 20 Յուլիսին հրապարակած էր Ռուսիոյ եւ Իսրայէլի քաղաքացի Լափշինի գործով դատավճիռը. ան դատապարտուած էր 3 տարուան բանտարկութեան:

Share.

Leave A Reply