Արմէն Ռուստամեան. ««Խաւարում» Խորագիրով Ցուցահանդէսին Փակումը Վրդովեցուցիչ Է»

0

Երկիր.- 12 Սեպտեմբերին, խորհրդարանին մէջ լրագրողներու հետ զրոյցի մը ընթացքին, ՀՅԴ խմբակցութեան ղեկավար Արմէն Ռուստամեան անդրադարձած է մշակոյթի նախարարութեան կողմէ Թումանեանի տուն-թանգարանի տնօրէն Նարինէ Թուխիկեանի կազմակերպած ցուցահանդէսի փակման։

«Ասիկա, ի հարկէ, վրդովեցուցիչ է: Ես նոր տեղեկացած եմ այդ մասին: Հանգամանքներուն քանի որ ծանօթ չեմ, չեմ կրնար պատասխանել, բայց ցուցահանդէս փակելը բնական բան չէ», ըսած է ան:

«Ես չեմ գիտեր, մանաւանդ եթէ 37-ի զոհերուն կը վերաբերի, ուստի մշակոյթի նախարարութիւնը ի՛նքը պէտք է խրախուսէ նման ցուցահանդէսներու իրականացումը: Մենք մեր պատմութիւնը պէտք է լա՛ւ ուսումնասիրենք: Մարդը ուսումնասիրութիւն ըրած է, ատոր հետ կապուած ցուցահանդէս հրաւիրած, իսկ մենք գիտենք, որ Յովհաննէս Թումանեանի երեք զաւակները ատոր զո՛հը եղած են, այսինքն՝ կապ կայ այդ ամէն ինչին մէջ», աւելցուցած է Ռուստամեան:

Յայտնենք, որ 4 Օգոստոսին Յովհհաննէս Թումանեանի անուան թանգարանի բացօթեայ տարածքին մէջ կայացաւ «Խաւարում» խորագիրով ցուցադրութեան բացումը, որ նուիրուած էր խորհրդային բռնատիրութեան զոհերուն: Հայաստանի մշակոյթի փոխնախարար Արեւ Սամուէլեանի պահանջով, ցուցահանդէսը փակուեցաւ: Ցուցահանդէսի փակման կապակցութեամբ Սամուէլեան նշած էր. «Ճիշդ է, մենք պէտք է պատմութեան պարզ երեսով նայինք, բայց կը կարծեմ, որ անիկա քիչ մը քաղաքականացուած էր: Այժմ սկսած են փողոցներու անուանափոխութեան հետ կապուած գործընթացներ, եւ այդ ցուցահանդէսն ալ ընկալուած է այդ ծիրին մէջ»:

Share.

Leave A Reply