ԽՄԲԱԳՐԱԿԱՆ՝ Հոկտեմբեր Ա./2017 Արցախի Ճանաչման Ճանապարհը Աստիճանաբար Կը Հարթուի

0

Նախորդ շաբաթ, Արցախի միջազգային ճանաչման եւ արցախեան հարցի էութեան պարզաբանման նպաստող ողջունելի երեք երեւոյթ արձանագրուեցաւ:

Առաջինը թուրք լրագրողներու եւ քաղաքական գործիչներու Արցախ այցելութիւնն էր:

Անոնք յայտարարած էին, թէ եկած են Արցախ` տագնապի էութեան իրազեկ դառնալու, թրքա­կան հա­սա­րա­կու­թիւնը լու­սա­ւո­րե­լու, եւ իրենց տպա­ւո­րու­թիւն­նե­րը թուրք հանրու­թեան փոխանցելու համար` շրջանցելով Ատրպէյճանի «սեւ ցանկ»ին մէջ յայտնուելու սպառնալիքը:

Թուրք մտաւորականներուն այցելութիւնը քանի մը իրողութիւն լուսարձակի տակ կը բերէր: Նախ` թրքական կամ ատրպէյճանական պետական կողմերուն նկատմամբ անվստահելիութիւնը ու տագնապի քուրային մէջ յայտնուած երկրորդ կողմին` Արցախի պետութեան ու ժողովուրդին կարծիքը լսելու նոյնիսկ թուրք քաղաքական գործիչներու ցանկութիւնը: Ապա նաեւ Արցախի պետութիւնը որպէս տագնապի լուծման սատարող կողմ ընդունելու հակումը:

Երկրորդ յատկանշական դէպքը ԱՄՆ-ի Միշիկըն նահանգի Արցախի անկախութեան ճանաչումն ու Արցախի ինքնորոշման իրաւունքին սատարող բանաձեւի որդեգրումն էր: Միշիկըն Արցախի Հանրապետութեան անկախութիւնը ճանչցող ԱՄՆ-ի 8-րդ նահանգն էր: Երեւոյթ մը, որ անկասկած իր դրական անդրադարձը պիտի ունենար ոչ միայն Արցախի միջազգային ճանաչման, այլեւ Արցախի Հանրապետութեան հետ տնտեսական, մշակութային թէ քաղաքական յարաբերութիւններու բարելաւման վրայ:

Երրորդը` ՀՅԴ Բիւրոյի Երիտասարդական գրասենեակին հրաւէրով Ընկերվար Երիտասարդներու Միջազգային Միութեան անդամ միջազգային երիտասարդական-քաղաքական կազմակերպութիւններու շուրջ երկու տասնեակ ներկայացուցիչներու այցելութիւնն էր Հայաստան եւ Արցախի Հանրապետութիւն: Անոնց այցելութեան նպատակը Արցախի հարցի էութեան, ներքին կեանքին ու մշակոյթին ծանօթանալն էր: Երիտասարդ քաղաքական գործիչները եւս անտեսեցին Ատրպէյճանի սպառնալիքը` յայտնելով որ հիմնականը Արցախի ժողովուրդին ինքնորոշման իրաւունքը յարգելն ու անոր ջանքերով ծաղկող Արցախի անկախ Հանրապետութեան ճշգրիտ պատկերը աշխարհին փոխանցելն է:

Անոնցմէ մէկը պիտի հաստատէր. « Այս այցելութեամբ կը հասկնանք, որ ամբողջ պատմութեան ընթացքին Արցախը եղած է հայաբնակ տարածք, անիկա ազատ, անկախ պետութիւն է` հայ բնակիչներով»:

Երիտասարդ գործիչներուն Արցախ այցելութիւնը ողջունելի էր քանի մը դիտանկիւնէ: Նախ այն իմաստով, որ անոնք պիտի դառնան իրենց կուսակցութիւններուն կամ երկիրներուն ապագայ ղեկավարները, հետեւաբար ճիշդ կողմնորոշում պիտի ունենան Արցախի հարցին նկատմամբ, կամ առնուազն ենթակայ պիտի չըլլան ատրպէյճանական ապատեղեկատուութեան: Երկրորդ. այս այցելութիւններն ու Արցախի քաղաքական դէմքերու հետ հանդիպումները կը փաստեն, որ կարելի չէ Արցախի հարցին էութեան ծանօթանալ, կամ անոր լուծման եզրերը որոնել առանց արցախեան կողմին:

Վերոյիշեալ երեք երեւոյթները ցոյց կու տան, որ Արցախ այցելողներուն սպառնալու Ալիեւի քաղաքականութիւնը, իրողութիւնները թաքցնելու անյաջող փորձ մը ըլլալէն անդին, ճշմարտութիւնը որոնող լայնամիտ քաղաքական գործիչներու համար Արցախ այցելութեան խթան կրնայ հանդիսանալ` հայկական կողմին վարած քաղաքականութեան ու թափած ճիգերուն առկայութեան:

 

Share.

Leave A Reply