Գնահատանք` Հալէպ Քաղաքի Ելեկտրական Ընկերութեան Տնօրէնութեան եւ Պաշտօնէութեանց

0

Սուրիոյ պատերազմին հետեւանքով Հալէպ քաղաքը նիւթական եւ բարոյական ահաւոր վնասներ կրեց, վնասներուն մաս կը կազմէր ելեկտրական ցանցերու  քանդումը, որոնք սակայն աստիճանաբար վերանորոգուիլ սկսան` շնորհիւ Ելեկտրական Ընկերութեան մշտական հետապնդումներուն:

Արդարեւ, Շաբաթ, 30  Սեպտեմբեր 2017-ի առաւօտ ժամը 11:30-ին, Սուրիոյ Հայ Աւետարանական Համայնքի Համայնքապետ Վեր. Յարութիւն Սելիմեան գեղեցիկ մտայղացում մը ունեցաւ` գնահատելու Հալէպ քաղաքի Ելեկտրական  Ընկերութեան տնօրէնութիւնն ու պաշտօնէութիւնը, որոնց անխնայ ջանքերով եւ յարատեւ աշխատանքով Հալէպ  քաղաքը դարձեալ օժտուեցաւ ելեկտրականութեան հոսանքով:

Հաւաքին հրաւիրուած էին 100-է աւելի  պաշտօնեաներ:

Յայտագիրը սկսաւ Վեր. Համայնքապետին ողջոյնի խօսքով, ուր ան իր երախտագիտութիւնն ու շնորհակալութիւնը յայտնեց Հալէպ քաղաքի Ելեկտրական Ընկերութեան տնօրէնութեան ու պաշտօնէութեան` անոնց թափած յարատեւ ջանքերուն եւ նուիրումին համար: Ան դիտել տուաւ, թէ  պաշտօնեաները որպէս սուրիացի քաղաքացիներ մնացին պատնէշի վրայ հաստատակամ, իրենց անկեղծութեամբ, հաւատարմութեամբ եւ խնամատար աշխատանքով: Ան պաշտօնեաներուն աշխատանքը ազգային պատուաբեր գործ համարեց:

Իր խօսքին աւարտին, ան մաղթեց որ Տէրոջ օրհնութիւնը, պաշտպանութիւնն ու նախախնամութիւնը անպակաս ըլլայ անոնց կեանքէն:

Վերապատուելիին խօսքէն ետք, Ելեկտրական Ընկերութեան տնօրէնը յատուկ շնորհակալութիւն յայտնեց Վեր. Համայնքապետին այս նշանակալից, խթանող եւ աննախընթաց նախաձեռնութեան  համար, որ առիթը ընծայեց 100-է աւելի պաշտօնեաներ համախմբելու եւ քաջալերելու:

Ապա հրաւիրեալները աւանդական նախաճաշի` ֆուլի ու շաապիէթի սեղանին շուրջ մտերմաբար զրուցեցին:

Աւարտին Վեր. Համայնքապետ Յարութիւն Սելիմեան նիւթական նուէր բաշխեց պաշտօնեաներուն` առ ի գնահատանք իրենց մարտունակութեան եւ անսակարկ ծառայութիւններուն:

Թղթակից

Share.

Leave A Reply