Թարգմանչացի Ոգիով «Եկէ’ք Մաքուր Հայերէն Խօսինք»

0

Հովանաւորութեամբ ՀՄԸՄ-ի Սուրիոյ Շրջ. Վարչութեան, Սրբոց Թարգմանչաց տօնի նախօրեակին ՀՄԸՄ-ի Սուրիոյ Շրջ. Վարչութեան Մամուլի Յանձնախումբը, նախանձախնդիր ըլլալով հայերէնի անաղարտ պահպանման, միջվարժարանային միօրեայ գործունէութիւն մը կազմակերպեց` «Եկէ’ք Մաքուր Հայերէն Խօսինք» խորագիրով, Շաբաթ 30 Սեպտեմբեր 2017-ին, Մխիթարեան վարժարանի տարածքէն ներս:

Գործունէութեան իրենց մասնակցութիւնը բերին հալէպահայ վարժարաններու 4-րդ, 5-րդ, 6-րդ, 7-րդ եւ 8-րդ կարգերէն աւելի քան 500 աշակերտներ:

Անոնք ճշդուած վայրը ժամանելով, ձեռքի գունաւոր կապեր կրելով խումբերու բաժնուեցան: Խումբերու պատասխանատուներ նշանակուեցան ՀՄԸՄ-ի Հալէպի Մասնաճիւղի աստիճանաւորներէն: ՀՄԸՄ-ի Սուրիոյ Շրջ. Վարչութեան ատենադպրուհի Գարօլին Քիւրքլեան աշակերտներուն բացատրեց գործունէութեան նպատակը եւ ճշգրիտ հայերէն խօսելու անհրաժեշտութիւնը, ապա հրաւիրեց Մխիթարեան Միաբան, Մխիթարեան վարժարանի եւ վանատան պատասխանատու Հայր Համազասպ Վրդ. Քէշիշեանը` Սրբոց Թարգմանչաց տօնին խորհուրդը ներկայացնելու:

Հայր Համազասպ ըսաւ, որ Սուրբ Մեսրոպ Մաշտոցի շնորհիւ մենք ունեցանք հայերէն այբուբենը, որպէսզի մեր ինքնութիւնը պահենք, աղօթենք եւ մեր մտքերը գրի առնենք հայերէն լեզուով: Հայր Սուրբը աշակերտութեան բացատրեց, թէ ինչպէ՛ս մեր սուրբ հայրերը մոմի նման մաշելով լուսաւորեցին մեզ ու մաղթեց, որ նոր սերունդը ընթանայ մեր  հայրերուն ուղիով եւ հայերէն լեզուն պահելով տէր կանգնի մեր սրբազան արժէքներուն:

Այնուհետեւ, աշակերտները դաշտին մէջ նախապէս գրուած «Հայերէն Խօսինք» նախադասութեան վրայ շարուելով գեղեցիկ պատկեր մը կազմեցին, ետքը ՍՕ Խաչի «Փեթակ»ին պատրաստած համեղ խմորեղէնները նախաճաշեցին:

Յայտագիրի յաջորդ օրակարգով 4-րդ, 5-րդ եւ 6-րդ կարգերու աշակերտները Մխիթարեանի գեղեցիկ տարածքին մէջ խումբ առ խումբ «Ռալի»ի տաղաւարները շրջելով լեզուաբանական, տառերու եւ բառերու խաղերու, ինչպէս նաեւ հարց-պատասխաններու մասնակցեցան: Իսկ 7-րդ եւ 8-րդ կարգերու աշակերտները պատի թերթ ու թատրոն պատրաստեցին եւ երգի ուսուցում կատարեցին: Այնուհետեւ 7-րդ եւ 8-րդ կարգերը հայերէն լեզուի քերականական կանոններուն շուրջ մրցումներու մասնակցեցան, իսկ 4-րդ, 5-րդ եւ 6-րդ կարգերը երգի ուսուցման:

Միջօրէի դադարին, անոնք «Փեթակ»էն համեղ ակրատները ճաշակեցին, որմէ ետք պատրաստուած թատրոններու ներկայացումը վայելեցին:

Աւարտին, յանձնախումբին կողմէ այս առիթով պատրաստուած թերթիկներ բաժնուեցան մասնակիցներուն:

ՀՄԸՄ-ի Սուրիոյ Շրջ. Վարչութեան

Մամուլի Յանձնախումբ

Share.

Leave A Reply