Ալիեւ. «Ատրպէյճան Եւրոպայի Համար Միակ Նոր Ուժանիւթի Աղբիւրն է»

0

Ատրպէյճանական «Մինվալ» կայքը կը հաղորդէ, որ Ատրպէյճանի նախագահ Իլհամ Ալիեւ Եւրոպական Խորհուրդի քաղաքականութեան եւ անվտանգութեան հարցերով յանձնախումբի պատուիրակութեան հետ հանդիպումին ընթացքին ըսած է, որ եթէ Ատրպէյճան լքէ Եւրոպական խորհուրդը, ատրպէյճանցիներու կեանքէն ոչինչ պիտի փոխուի:

«Ձեզի անկեղծ ըսեմ, ընկերաբար, որ եթէ Ատրպէյճանը հեռանայ Եւրոպական Խորհուրդէն, ոչ մէկը ատոր նշանակութիւն պիտի տայ: Մեր կեանքին մէջ ոչինչ պիտի փոխուի, մենք ո՛չ աւելի լաւ, ո՛չ աւելի վատ, ո՛չ աւելի հարուստ, ո՛չ ալ աւելի աղքատ պիտի ապրինք», յայտարարած է Ալիեւ:

«Ինչ կը վերաբերի եւրոպական կառոյցներուն, կ՛ուզեմ անգամ մը եւս նշել, թէ Եւրոպական Միութիւնը մեզի համար առաջնահերթութիւն է, իսկ ձեր այցելութիւնը կը վկայէ, թէ Ատրպէյճան նոյնպէս կարեւոր գործընկեր է Եւրոպայի համար», աւելցուցած է ան:

Ալիեւ յայտնած է, որ վերջին ժամանակաշրջանին Եւրոպական խորհուրդի որոշ պաշտօնական ներկայացուցիչներ նոր յարձակումներ սկսած են Ատրպէյճանի դէմ:

«Անոնք կը սպառնան մեզ անդամակցութենէն զրկել եւ մեր դէմ պատժամիջոցներ կիրարկել: Բնականաբար, մեր քաղաքական գործիչները, խորհրդարանականները, լրագրողները եւ քաղաքացիները պատշաճ արձագանգ ցոյց կու տան: Նախ, թող անոնք ապահովեն անդամ երկիրներուն առնչութեամբ Մարդու իրաւունքներու եւրոպական դատարանին որդեգրած աւելի քան 10 հազար որոշումներուն իրականացումը, միայն ատկէ ետք կրնան խօսիլ Ատրպէյճանը անդամակցութենէ զրկելու կամ պատժամիջոցներու մասին: Եթէ ատիկա տեղի ունենայ, ատիկա պիտի ըլլայ երկակի չափանիշներու յաղթանակ: Այդ պատճառով Ատրպէյճանի նկատմամբ նպատակաուղղուած յարձակումները հիասթափութիւններ կը յառաջացնեն, կը նպաստեն այնպիսի միտքերու, ինչպիսիք են` «իսկ ինչո՞ւ համար մեզի պէտք է այդ կազմակերպութիւնը», ըսած է Ալիեւ:

Ան աւելցուցած է, որ Ատրպէյճանի մէջ Եւրոպական Խորհուրդին հետ կապուած հանրային կարծիքը այնքան ալ դրական չէ, եւ նշած է, որ այդ կազմակերպութեան միանալու ժամանակ իրենց ակնկալիքները կապուած էին Լեռնային Ղարաբաղի տագնապի լուծման հարցին մէջ ակնկալուող աջակցութեան հետ, «ինչ որ, սակայն, տեղի չունեցաւ»: Բացի ատկէ, ան յայտնած է, թէ Ատրպէյճան Հայաստանի հետ նոյն օրը միացած է այդ կազմակերպութեան, եւ համեմատած է Ատրպէյճանի դէմ չափազանց բացասական վերաբերմունքը «Հայաստանի նկատմամբ կազմակերպութեան դրական վերաբերմունքին հետ»:

Ան նաեւ նշած է. «Ատրպէյճան Եւրոպայի համար միակ նոր ուժանիւթային աղբիւրն է»: «Ատրպէյճանի մէջ ուժանիւթի բնագաւառի զարգացումը չի սահմանափակուիր մեր սահմաններով: Ինչ կը վերաբերի մեր ուժանիւթի անվտանգութեան, ամբողջ աշխատանքը կատարուած է, մենք կ՛արտածենք քարիւղ, կազ եւ ելեկտրականութիւն տարբեր ուղղութիւններով: Մենք 7 խողովակաշար ունինք` 3-ը քարիւղ փոխադրող, 4-ը` կազ տեղափոխող»:

Ալիեւի համաձայն, վերջին մեծագոյն կազի խողովակաշարը Պաքուէն կ՛երկարի Իտալիա, ատոր կառուցումը կը շարունակուի:

«Մեզի համար մեծագոյն շուկան Եւրոպան է, որ ա՛լ աւելի շատ պիտի ունենայ կազի կարիք: Մեզի յայտնի է, որ Եւրոպայի մէջ բնական կազի պահանջարկը պիտի աճի, իսկ Ատրպէյճան Եւրոպայի համար միակ նոր ուժանիւթի աղբիւրն է: Ատրպէյճան նոր աղբիւր է, հեռու չի գտնուիր, պաշարները մեծ են, ունի տասնամեակներու համար բաւարար կարողականութիւն», ըսած է ան:

Share.

Leave A Reply