Թուրքիոյ Ազգայնական Շարժումի Անդամներ Լքելով Կուսակցութեան Շարքերը Կը Միանան Մերալ Աքշեների Կողմէ Հիմնուելիք Նոր Կուսակցութեան

0

Ըստ «Արմէնփրէս»ի,  թրքական «Տիքէն» կայքը կը հաղորդէ, որ Թուրքիոյ Ազգայնական Շարժում կուսակցութեան անդամները կը շարունակեն լքել քաղաքական այդ ոյժին շարքերը` միանալու Մերալ Աքշեների կողմէ հիմնուելիք նոր կուսակցութեան:

Թուրքիոյ Այտըն նահանգէն կուսակցութեան շարքերը լքած է 460 մարդ, իսկ Մանիսայէն` 203: Կուսակցութենէն հեռացող անդամներուն շարքին են նաեւ նախկին երեսփոխաններ:

«Մենք այլեւս տեղ չունինք այս կուսակցութեան մէջ: Այսուհետեւ կը նախընտրենք ըլլալ Մերալ Աքշեների կողքին», ըսած է նախկին երեսփոխան Ռեճէպ Թանէր:

Նախապէս կուսակցութենէն հեռանալու դէպքեր արձանագրուած էին Թուրքիոյ այլ նահանգներու մէջ եւս:

Մերալ Աքշեներ նախապէս վարած է Թուրքիոյ ներքին գործոց նախարարի, ինչպէս նաեւ խորհրդարանի փոխնախագահի պաշտօնները: Կ՛ակնկալուի, որ անոր կուսակցութիւնը պաշտօնապէս արձանագրուի Հոկտեմբերի կէսերուն: Կը նշուի, որ կուսակցութեան անունը պիտի ըլլայ Կեդրոնական Ժողովրդավարական Կուսակցութիւն:

Նորաստեղծ կուսակցութեան շարքերուն մէջ պիտի ըլլան Ազգայնական Շարժում կուսակցութենէն հեռացած այն գործիչները, որոնք դէմ են կուսակցութեան վերջին շրջանի քաղաքականութեան. Ազգայնական Շարժում կուսակցութիւնը վերջին շրջանին դաշինք կազմած է Էրտողանի ղեկավարած Արդարութիւն եւ Բարգաւաճում կուսակցութեան հետ:

Թուրքիոյ մէջ կը քննարկուի այն հարցը, որ 2019-ին նախագահական ընտրութիւններուն մէջ Աքշեներ պիտի ըլլայ Էրտողանի հիմնական հակառակորդը: Ուշագրաւ է, որ ան պիտի ըլլայ առաջին կին քաղաքական գործիչը, որ իր թեկնածութիւնը պիտի առաջադրէ Թուրքիոյ նախագահական ընտրութեան:

Share.

Leave A Reply