ՀՄԸՄ–ի Գամիշլի Մասնաճիւղի Մասիս Խումբը Վերականգնեց Իր Երբեմնի Փառքը

0

Լարուած պայմաններու մէջ ապրող համայնք մը կրնա՞յ բնականոն կեանք ապրիլ, կը հարցնէ հաւանաբար մեր ընթերցողը… Այո’, կրնայ, եթէ գամիշլիահայութեան կամքն ու եռանդը ունենայ։

ՀՄԸՄ-ի Գամիշլի Մասնաճիւղն ալ այդ կենսունակութեան մարմնաւորումն է։ Մասնաճիւղի վարչութեան և մարզական յանձնախումբին կազմակերպութեամբ, Սեպտեմբեր ամսուան ընթացքին ֆութպոլի մրցաշարք մը տեղի ունեցաւ, նուիրուած՝ ՀՄԸՄ-ի հիմնադրութեան 100–ամեակին, մասնակցութեամբ վեց խումբերու, որոնք բաժնուեցան երկու խմբակներու։ Առաջին խմբակին մաս կազմեցին Մասիս(Ա), Մար Եագուպ, Ալ Մահապէ, իսկ երկրորդ խմբակին՝ Մասիս(բ), Մար Քըրիաքըս խումբերը եւ սուրիանի սկաուտները։

Մրցումի առաջին փուլին յաղթող խումբերը երկրորդ փուլին կրկին դէմ առ դէմ խաղցան։ Աւարտական խաղը տեղի ունեցաւ Կիրակի, 24 Սեպտեմբերի Երեկոյեան ժամը 7:30 ին, ներկայութեամբ Պատկան Մարմնին և ՀՄԸՄ–ի Ս. Շրջ. Վարչութեան ներկայացուցիչներուն, ինչպէս նաև ՀՄԸՄ–ի վարչութեան և մարզասէր բազմութեան:

Աւարտական փուլ հասած երկու խումբերը՝ Մասիս(Ա) եւ Մար Եագուպ, իրենց խաղով խանդավառեցին ներկաները, որոնց կանչերն ու ծափողջոյնները թնդացուցին խաղադաշտը ամբողջ մրցումի տեւողութեան, մինչև իրաւարարի վերջին սուլիչը, երբ ան 5-3 արդիւնքով ախոյեան հռչակեց Մասիս խումբը։

Աւելցնենք որ ԻւՆԻՍԵՖի Սատա Յանձնախումբը իր մասնակցութիւնը բերաւ՝ օժանդակելով կազմակերպչական աշխատանքին։ Յանձնախումբն ու վարչութիւնը երկու բաժակ նուիրեցին Մասիսի երէց վարչականներէն Մովսէս Ադամեանին և երէց խաղցող Նուպար Ղազարեանին, ապա տեղի ունեցաւ բաժակներու փոխանակում ՀՄԸՄ–ի վարչութեան և Սատա–ի տնօրէնութեան միջև։

Բժշկհ. Մարի Մելքոն

Share.

Leave A Reply