Կարէն Կարապետեան Եւ Էսհաք Ճահանկիրի Քննարկած Են Երկկողմանի Տնտեսական Համագործակցութեան Ընդլայնման Ուղղուած Շարք Մը Հարցեր

0

ՀՀ Վարչապետ Կարէն Կարապետեան Իրանի Իսլամական Հանրապետութեան առաջին փոխնախագահ Էսհաք Ճահանկիրիի հրաւէրով պաշտօնական այցելութեամբ ժամանած է Իրան: Թեհրանի «Մեհրապաղ» օդակայանին մէջ պաշտօնական դիմաւորման արարողութենէն ետք վարչապետ Կարապետեանի գլխաւորած պատուիրակութիւնը ուղեւորուած է ԻԻՀ թագաւորական «Սաադապատ» պալատ, ուր տեղի ունեցած է Կարէն Կարապետեանի եւ Էսհաք Ճահանկիրիի հանդիպում-առանձնազրոյցը։
ՀՀ կառավարութեան ղեկավարը շնորհակալութիւն յայտնած է ջերմ ընդունելութեան համար ու շնորհաւորած է Էսհաք Ճահանկիրին Իրանի նախագահի առաջին տեղակալի պաշտօնը ստանձնելուն առիթով: Վարչապետը բարձր գնահատած է բարեկամ Իրանի հետ ձեւաւորուած սերտ, բարիդրացիական յարաբերութիւնները, որոնք կը շարունակուին զարգանալ փոխվստահութեան մթնոլորտի մէջ: «Լիայոյս եմ, որ այս հանդիպումէն ետք մենք նոր շունչ կը դնենք մեր համագործակցութեան եւ մեր օրակարգին վրայ գտնուող բոլոր ծրագիրներուն: Տնտեսական համագործակցութեան անդրադառնալով՝ պէտք է նշեմ, որ այն զգալիօրէն կը զիջի մեր երկիրներու միջեւ առկայ բարձր մակարդակի քաղաքական երկխօսութեան: Սակայն աւելի վստահ եմ, որ կրնանք նոր յաջողութիւններ արձանագրել մեր համագործակցութեան տնտեսական գետնի վրայ»,  յայտնած է Կարէն Կարապետեան:
ԻԻՀ առաջին փոխնախագահ Էսհաք Ճահանկիրի շնորհակալութիւն յայտնած է ՀՀ վարչապետին իր հրաւէրին ընդառաջելու եւ Իրան այցելելուն համար ու բարձր գնահատածէ երկու երկիրներու յարաբերութիւններու ներկայիս մակարդակը: Էսհաք Ճահանկիրի կարեւոր նկատած է երկու դրացի ու բարեկամ պետութիւններու միջեւ տարբեր բնագաւառներու տնտեսական յարաբերութիւններու շարունակական զարգացումը եւ վստահութիւն յայտնած է, որ վարչապետ Կարապետեանի պաշտօնական այցելութիւնը կը նպաստէ տնտեսական համագործակցութեան  աւելի աշխուժացումին ու ընդլայնումին:
ՀՀ վարչապետն ու Իրանի նախագահի առաջին տեղակալը երկկողմանի տնտեսական օրակարգի կարեւոր ծրագիրներէն համարած են Իրան-Հայաստան 400 քիլովաթ լարման ելեկտրահաղորդման 3-րդ գիծի կառուցման ծրագիրը, որ կարելիութիւն կու տայ աւելցնել երկու երկիրներու միջեւ ելեկտրականութեան եւ կազի փոխանակման ծաւալները՝ նպաստելով թէ՛ երկիրներու միջեւ տնտեսական յարաբերութիւններու զարգացման, թէ՛ այս բնագաւառէն ներս տարածաշրջանային համագործակցութեան ընդլայնման: Կողմերը մեծապէս կարեւոած են նաեւ Մեղրիի ՀԷԿ-ի ծրագիրի իրականացումը: Իրան-Հայաստան տնտեսական, առեւտրային յարաբերութիւններու զարգացման համար նշանակալի համարուած է «Սիւնիք ազատ տնտեսական գօտիի» դերը, վերջինիս եւ իրանական «Արաս» ազատ գօտիներու համագործակցութիւնը: «Վստահ եմ, որ այս գօտին կրնայ հետաքրքրել թէ՛ իրանական կազմակերպութիւններուն, որոնք կը փափաքին դուրս գալ ԵԱՏՄ, եւրոպական շուկաներ, քանի որ Հայաստանը կը տիրապետէ GSP+ արտօնեալ համակարգին, ինչպէս նաեւ այն ընկերութիւններուն, որոնք Իրանի հետ համագործակցութեան սահմանափակումներ կ’ունենան: Այս շրջագիծին մէջ նաեւ արդիւնաւէտ գործիք կրնայ ըլլալ արտահանող ներմուծող ընկերութեան ստեղծումը», ընդգծած է Կարէն Կարապետեան՝ աւելացնելով, որ ՀՀ կառավարութիւնը պատրաստ է աջակցիլ ընկերութեան՝ ԵԱՏՄ շուկայէն դուրս գալու հարցով:
Կարէն Կարապետեանի եւ Էսհաք Ճահանկիրիի առանձնազրոյցին յաջորդած է ընդլայնուած կազմով հանդիպում մը, որուն ընթացքին քննարկուած են տարբեր ոլորտներէ ներս համագործակցութեան հեռանկարները:
Հայաստանի եւ Իրանի համագործակցութեան կարեւոր ոլորտներէն համարուած է միջազգային փոխադրական միջանցքներու զարգացումը, տարանցիկ փոխադրումները, հիւսիս-հարաւ ճանապարհային միջանցքի ծրագիրի առանձին հատուածներու կառուցման ուղղութեամբ իրանական կողմի հնարաւոր մասնակցութիւնը:
Անդրադարձ կատարուած է  Հայաստան-Իրան-Թուրքմենիստան եռակողմ ուժանիւթի ոլորտին համագործակցութեան: Կարեւոր նկատուած է նաեւ երկու երկիրներու միջեւ աշխոյժ համագործակցութիւնը նաեւ մաքսային մարմիններու միջեւ:

Վարչապետ Կարապետեան տեղեկացուցած է, որ ՀՀ կառավարութիւնը նախաձեռնած է Հայաստան-Իրան սահմանային անցակէտի արդիականացման ծրագիրը:
Անդրադառնալով Իրան-ԵԱՏՄ ազատ առեւտուրի համաձայնագիրի շուրջ բանակցութիւններուն՝ ՀՀ կառավարութեան ղեկավարը յոյս յայտնած է, որ գործընթացը հնարավորինս շուտ կ’աւարտի եւ նշած է, որ հայկական կողմը պատրաստ է անհրաժեշտ աջակցութիւնը ցուցաբերելու:
Կողմերը համակարծիք էին, որ անհրաժեշտ է աշխուժացնել հայ-իրանական միջկառավարական յանձնաժողովի աշխատանքները՝ պայմանաւորուելով մօտիկ օրերուն կազմակերպել հերթական 15-րդ նիստը:
ՀՀ վարչապետը եւ Իրանի առաջին փոխնախագահը նաեւ անդրադարձած են տարածաշրջանային զարգացումներուն: Այս շրջագիծէն ներս Կարէն Կարապետեան շնորհակալութիւն յայտնած է իրանական կողմին ԼՂ հիմնախնդիրին նկատմամբ հաւասարակշռուած դիրքորոշմումին համար:
Կարէն Կարապետեան իր կարգին Էսհաք Ճահանկիրին պաշտօնական այցելութեամբ հրաւիրած է Հայաստան:
Հանդիպումին քննարկուած են նաեւ տեղեկատուական արհեստագիտութիւններու, կապի, փոխադրամիջոցներու, գիւղատնտեսութեան, զբօսաշրջութեան, կրթութեան եւ մշակոյթի բնագաւառներուն մէջ համագործակցութեան շուրջ հարցեր:

Share.

Leave A Reply