Երեւանի Մէջ Սուրիահայերու Հիմնախնդիրները Համակարգող Միջգերատեսչական Յանձնաժողովի Հերթական Նիստը Գումարուեցաւ

0

6 Հոկտեմբերին ՀՀ Սփիւռքի Նախարարութեան կեդրոնէն ներս գումարուեցաւ Սուրիահայերու Հիմնախնդիրները Համակարգող Միջգերատեսչական Յանձնաժողովի հերթական նիստը: Նիստին նախագահեց նախարար Հրանոյշ Յակոբեան:

ՀՀ սփիւռքի նախարարը յայտնեց, որ Սուրիոյ մէջ ընթացող պատերազմին հետեւանքով Հայաստան տեղափոխուած սուրիահայերու խնդիրները մշտապէս գտնուած են Հայաստանի Կառավարութեան ուշադրութեան կիզակէտին մէջ: «Սիրիահայերու հետ մեր ամէնօրեայ աշխատանքի ընթացքին նկատեցինք, որ վերջիններս բաւարար չափով տեղեկացուած չեն Հայաստանի Հանրապետութեան օրէնսդրութեան, լաւ չեն գիտեր իրենց իրաւունքներն ու պարտաւոանութիւնները: Ուստի որոշեցինք Սուրիայէն եւ հակամարտութեան այլ վայրերէ Հայաստան տեղափոխուած անձերուն համար կազմել յաճախ իրաւական հարցերու տեղեկատուական ձեռնարկ: Ձեռնարկը իրականացուցինք ԱՄՆ արտաքին գործոց Նախարարութեան բնակչութեան, փախստականներու եւ գաղթականներու բիւրոյի կողմէ տրամադրուած դրամաշնորհին միջոցով», աւելցուց նախարարը:

Այնուհետեւ սուրիահայերուն ցուցաբերած աջակցութեան եւ նախատեսուող ծրագիրներուն մասին զեկուցեց ՀԲԸՄ հայաստանեան գրասենեակի փոխտնօրէն Յովիկ Էօրտէկեան: Ան դիտել տուաւ, որ սուրիահայ ուսանողներու մասնավճարներու փոխհատուցման ծրագիրը ՀՀ Կառավարութեան եւ այլ կառոյցներու հետ համագործակցաբար պիտի շարունակուի նաեւ 2017-2018-ին ուսումնական տարուան ընթացքին:

«Ամքոր Հայաստան» հիմնադրամի սուրիահայերու աջակցութեան ծրագիրներու համակարգող Անահիտ Գասպարեան խօսեցաւ իրենց հիմնադրամին կողմէ սուրիահայերուն տրամադրուող աջակցութեան մասին:

Երեւանի քաղաքապետարանի հանրակրթութեան վարչութեան պետ Աննա Ստեփանեան ներկայացուց Երեւանի դպրոցներուն մէջ սուրիահայ երեխաներու ընդելուզման գործընթացքի ներկայ վիճակը: Ան տեղեկացուց, որ յատուկ ուշադրութիւն կը դարձուի զանազան ձեռնարկներու մէջ սուրիահայ երեխաներու ընդգրկումին:

Քննարկուեցաւ երեւանեան որոշ դպրոցներու մէջ արեւմտահայերէնի դասընթացներ կազմակերպելու հարցը:

Սուրիահայ երեխաներու ամառնային հանգիստի կազմակերպման մասին զեկուցեց Սփիւռքի Նախարարութեան աշխատակազմի Մերձաւոր եւ Միջին Արեւելքի հայ համայնքներու վարչութեան պետ Լեւոն Անտոնեան: Անդրադառնալով կազմակերպչական աշխատանքներուն` զեկուցաբերը ըսաւ, որ ամէն տարի` ամառնային ճամբարներու նախաշեմին Սփիւռքի Նախարարութեան նախաձեռնութեամբ հանդիպումներ կը կազմակերպուին գործընկեր կառոյցներու ներկայացուցիչներուն հետ, ուր կը քննարկուին ճամբարներու կազմակերպման հարցով համագործակցութեան կարելիութիւնները: «Այս տարի սուրիահայ երեխաները հանգստացան «Արի տուն» ծրագիրին շրջագիծին մէջ իրենց համար կազմակերպուած ամառնային ճամբարին մէջ, ինչպէս նաեւ Սեւանի, Հանքաւանի «Արագած» եւ «Շողիկ», Լոռի մարզի Վահագնաձոր գիւղի «Գուգարք» ճամբարներուն մէջ: Ընդհանուր առմամբ 2017-ին 171 սուրիահայ երեխաներ նման ծրագիրներու մէջ ներառուեցան», յայտնեց Անտոնեան:

ՀՀ սփիւռքի նախարար Հրանոյշ Յակոբեան կարեւոր համարեց Հայաստանի տարբեր ճամբարներու մէջ սուրիահայ երեխաներու ներառումը` աւելցնելով, որ այն կը նպաստէ անոնց հոգեկան եւ ֆիզիքական առողջութեան ամրապնդման, մտաւոր զարգացման եւ բերկրանքի պահեր կը հաղորդէ երեխաներուն:

Նախարարը շնորհակալութիւն յայտնեց գործընկեր կառոյցներուն, որոնք այս տարիներուն ընթացքին մշտապէս եղած են սուրիահայ երեխաներուն կողքին եւ անոնց յորդորեց գալիք տարուան պիւտճէն կազմելու ընթացքին, նախատեսուող ծրագիրներուն մէջ ընդգրկել առանձին բաղադրիչ` սուրիահայ երեխաներու ամառնային ճամբարներու կազմակերպման համար:

Share.

Leave A Reply