Նախարար Հրանոյշ Յակոբեան. «Սուրիահայերը Իրենց Գործունէութեամբ, Աշխատասիրութեամբ եւ Բարեացակամութեամբ Հայաստանի Զարդը Դարձած են»

0

«Արմէնփրէս» կը հաղորդէ, որ Հայաստանի Հանրապետութեան սփիւռքի նախարար Հրանոյշ Յակոբեանի կարծիքով, սուրիական ճգնաժամին հետեւանքով Հայաստան ապաստանած սուրիահայերուն մեծամասնութիւնը կը շարունակէ ապրիլ Հայաստանի մէջ: Նախարարը դիտել տուած է, որ սուրիահայերը իրենց գործունէութեամբ, աշխատասիրութեամբ եւ բարեացակամութեամբ Հայաստանի զարդը դարձած են:

Ապա աւելցուցած է, որ սուրիահայերը Հայաստանի մէջ ոչինչէն գործեր կը ստեղծեն: Երեւոյթ մը, որ կը վկայէ, թէ անոնք պրպտող են, աշխատասէր են, մտածող են, կը փորձեն եւ հիմնականօրէն յաջողութեան կը հասնին:

«Շատ ու շատ սուրիահայերու հետ ես կը զրուցեմ, անոնց մեծամասնութիւնը չի փափաքիր մեկնիլ, բայց գիտէք, կեանք է` ոչ ոք կրնայ ըսել, թէ անոնց մօտեցումները վերջնական են: Մեր սիրելի, համեստ, խելացի ու կազմակերպուած, աշխատող ու գրագէտ սուրիահայերը Սուրիոյ մէջ ձգած են տուն, գործ, պատմութիւն, պատմական ու մշակութային ժառանգութիւն: Ատիկա փաստ է: Այն, որ անոնց հայեացքը դէպի Սուրիա է, այդ ալ փաստ է: Ոմանք օր մը պիտի վերադառնան, իրենց ունեցուածքին վերջնական գնահատականը կատարեն, վաճառեն, տեսնեն, թէ ինչ մնացած է իրենց ունեցուածքէն: Այս խնդիրները անոնց համար դեռ հարցական են: Այնպէս որ, անոնք դեռ հոգեբանօրէն հանգիստ վիճակի մէջ չեն: Ես կը կարծեմ, որ ատիկա պիտի ըլլայ այն ժամանակ, երբ Սուրիոյ մէջ վերջնական խաղաղութիւն հաստատուի: Հիմա այնտեղ համեմատաբար հանգիստ վիճակ է, տայ Աստուած, որ այդպէս ալ մնայ, սակայն քանի դեռ խաղաղութեան համաձայնագիր չէ ստորագրուած, այնտեղ լարուածութիւնը դեռ կայ, եւ սուրիահայերն ալ դեռ լարուածութեան մէջ են», ընդգծած է Հրանոյշ Յակոբեան:

Նախարարը դիտել տուած է, որ 2017-ի «Հայաստան-Սփիւռք» համաժողովի թեմաներէն մէկը նուիրուած էր սուրիահայերուն` յիշեցնելով, որ նման քննարկում ունեցած են նաեւ 2014-ին կայացած «Հայաստան- Սփիւռք» համաժողովի ընթացքին, աւելցնելով որ քննարկումները էականօրէն կը տարբերէին: Եթէ 2014-ին կար լարուածութիւն, պահանջքներ, դժգոհութիւններ, որ այս կամ այն հարցերը չեն լուծուած, ապա այս համաժողովի ընթացքին նման դժգոհութիւններ չեն հնչած: Նախարարը դիտել տուած է որ Հայաստանի նախագահի հովանիին ներքոյ 6 օդանաւ մարդասիրական օգնութիւն հասած է Սուրիա, նիւթական օժանդակութիւններ յատկացուած են Ծերանոցին, Պատսպարանին… ի վերջոյ ՀՀ-ը կարելի բոլոր միջոցներով փորձած է օգնել սուրիահայութեան, Հայաստան հաստատուած սուրիահայերն ալ համարկուած են հայաստանեան միջավայրին մէջ: Ըստ նախարարին, եթէ անոնք նախապէս կը պահանջէին, որ իրենց համար ըլլայ սուրիական դպրոց, որպէսզի իրենք իրենց ծրագիրը սորվին, ապա այսօր անոնք հայաստանեան դպրոցներուն մէջ փայլուն արդիւնքներ կ՛արձանագրեն: Անոնք փայլուն արդիւնքներ կ՛արձանագրեն նաեւ մշակոյթի, տնտեսութեան, գործարարութեան ոլորտներուն մէջ: Նախարարը ըսած է, որ ներկայիս իրենց հարցերուն լուծում չզտնող սուրիահայեր համարեա՛ չկան: Բնականաբար Հայաստանի մէջ սուրիահայերու համար գոյութիւն ունին բարդութիւններ, դժուարութիւններ, քանի որ անոնք Հայաստանի մէջ չեն վաստկիր այնքան, որքան կը վաստկէին Սուրիոյ մէջ, չեն ապրիր նոյն կենսամակարդակով, ինչ որ Սուրիոյ մէջ: Բայց ըստ նախարարին, անոնք արդէն յարմարած են Հայաստանի պայմաններուն ու քրտնաջան կ՛աշխատին:

Share.

Leave A Reply