Կիրօ Մանոյեան. «Թուրքիան Ցոյց Տուաւ, Որ Պատրաստ Չէ Առանց Նախապայմաններու Դիւանագիտական Յարաբերութիւններ Հաստատել ՀՀ-ի Հետ»

0

ՀՅԴ Բիւրոյի Հայ Դատի եւ քաղաքական հարցերու գրասենեակի պատասխանատու Կիրօ Մանոյեան «Հայ-թրքական յարաբերութիւնները արձանագրութիւններու ստորագրումէն առաջ եւ ետք» նիւթով քննարկման ընթացքին ըսաւ. «Հայ-թրքական արձանագրութիւններու ստորագրութենէն ետք, Հայաստան-Թուրքիա աւելի լարուած են, քան ստորագրութեան նախորդող շրջանին»:

Անոր խօսքով, արձանագրութիւնները ստորագրուած են եւ ութ տարի է ի վեր չեն վաւերացուած Թուրքիոյ կողմէ, աւելի ճիշդ՝ Թուրքիոյ պատճառով, ու մթնոլորտը աւելի վատթարացած է:

Մանոյեան ըսաւ, որ Թուրքիա ցոյց տուաւ, որ պատրաստ չէ առանց նախապայմաններու դիւանագիտական յարաբերութիւններ հաստատել Հայաստանի հետ:

«Այն իրողութիւնը, որ Հայաստանի իշխանութիւնները, այսօր, չեն փափաքիր որեւէ յարաբերութիւն մշակել Թուրքիոյ հետ, կը վկայէ, որ իսկապէս դժգոհ են կատարուածէն», յայտնեց Մանոյեան:

ՀՀ նախագահ Սերժ Սարգսեանի ՄԱԿ-ի ամպիոնէն արտասանած այն յայտարարութեան մասին, ըստ որուն, մինչեւ 2018-ի գարունը արձանագրութիւններու կենսագործման ուղղութեամբ որեւէ դրական տեղաշարժի բացակայութեան պարագային Հայաստան երկու երկիրներու արձանագրութիւնները պիտի յայտարարէ առ ոչինչ, Մանոյեան ըսաւ որ Թուրքիա երեք նախապայման դրած է արդէն եւ հաւանականութիւն չկայ որ մինչեւ գարունը Թուրքիոյ կողմէ որեւէ դրական տեղաշարժ տեղի ունենայ, հետեւաբար Հայաստանի կողմէ հայ-թրքական արձանագրութիւններուն առ ոչինչ յայտարարուիլը աւելի ճիշդ ճամբու վրայ կը դնէ ամէն բան:

Կիրօ Մանոյեանի կարծիքով նախապայմաններու  յառաջ մղումը պատրուակ է, քանի որ Թուրքիոյ քաղաքական մտածողութեան մէջ անկախ Հայաստան չկայ, իսկ ղարաբաղեան հարցը լծակ է Ատրպէյճանի հետ իր յարաբերութիւններուն մէջ:

Share.

Leave A Reply