Ուղտասարի Մէջ Սկսած Է Չիրի Արտադրութիւնը

0

Իրանահայութեան «Թեւանիկ» բարեսիրական խումբին նոր ծրագիրը կը նպատակադրէ Արցախի մէջ զարգացնել չիր պատրաստելու բազմադարեան աւանդոյթը, օգնել հայ գիւղացիին ու Արցախի տնտեսական իրավիճակը բարելաւել:

Երկուքուկէս մեթր բարձրութեամբ` պտուղներ չորցնելու սարքը տրամադրուած է Ասկերանի շրջանի Ուղտասար շրջանին մէջ ապրող Յովսեփեաններու ընտանիքին: Գիւղի ազատագրումէն 7 տարի անց, 2000-ին, Կարօ Յովսէփեանի ընտանիքը առաջիններէն էր, որ բնակութիւն հաստատեց գիւղին մէջ: Գիւղի առաջին հարսանիքն ալ  Կարոյին որդւոյն հարսանիքն էր: Աշխատասէր, համեստ ու հոգւով-սրտով հողին նուիրուած Կարոյին երազանքը «Թեւանիկ» խումբն էր որ իրականութիւն դարձուց:

«Ուղտասարի մէջ մենք  այգեգործութեամբ ու բանջարագործութեամբ կը զբաղէինք: Տեւաբար երազած եմ մեր բերքը մշակել եւ արտահանել: Աստուծոյ կամքով հասած եմ այս յաջողութեան,- յայտնած է սկսնակ չրագործը եւ փորփրելով Իրանէն բերուած չիրի օրինակները` շեշտած,- կը տեսնէք, մեր պատրաստած չիրը ամենաքաղցրն ու ամենահամովը պիտի ըլլայ»:

Զարթօնք ապրող Ուղտասար համայնքի հողը բերրի է, այնտեղ գոյութիւն ունին տասնեակ տեսակի պարտէզներ` սալորի, դեղձի, կեռասի, ծիրանի, ձմերուկի: Կարոյին որդին` Արթուր Յովսեփեանը կը հաւաստիացնէ որ բերքը առատ է.

«Գիւղացիները տարիներ շարունակ բերքը իւրացնելու դժուարութիւն ունեցած: Մէկ առ մէկ խօսած եմ գիւղը ապրող մարդոց հետ, բոլորը միաձայն համաձայն գտնուած են եւ ողջունած արտադրութեան գաղափարը,- կ՛ըսէ երեք զաւակներու հայրը եւ ուրախութեամբ կը շտապէ խօսիլ ապագայ իր ծրագիրերուն մասին,- գիւղին մէջ հողամաս ունիմ եւ նպատակ ունիմ հետագային այնտեղ արտադրամաս հիմնել, աշխատատեղիներ ստեղծել»:

Չորցուած պտուղներու արտահանման հարց ալ չենք ունենարկը վստահեցնէ  «Թեւանիկ»  խումբի պատասխանատու Իվէթ Դանիէլեան.

«Մենք իրազեկ պիտի  պահենք այս ընտանիքը տարածաշրջանի շուկայի պայմաններուն եւ պահանջներուն, տեսականիի օրինակներ պիտի  տրամադրենք եւ օժանդակենք աղխատանքին,- կ՛ըսէ պարսկահայ ԻվԷթը,- «Թեւանիկ» խումբը 3-4 տարեկան  է, որ կը սնանի մայր հողին վրայ ապրող ժողովուրդէն: Մեր հայրենիքը մենք շատ թանկ գինով ձեռք բերած ենք, եւ պէտք է ոչինչ խնայենք հայրենիքը զարգացնելու համար: Անկախ այն բանէն, թէ ինչ երկինքի տակ ծնած ու ապրած ենք` Արցախի մէջ, ազատագրուած տարածքներու մէջ ապրող մանուկներուն համար լաւ ապագայ ապահովելը բոլորիս պարտքն է»:

Սարքը կարելիութիւն ունի 5-8 ժամուան ընթացքին 250 քկ. չիր պատրաստել: «Թիւանիկ»ը կը նպատակադրէ քանի մը  տարուան ընթացքին  2-րդ, 3-րդ սարքը ապահովել գիւղացիներուն:

«Եթէ կ՛ուզես հզօր Հայաստան ստեղծել, եթէ կ՛ուզես վրէժ լուծել թշնամիէդ, անոր քթին տակ ստեղծէ հզօր, ազատ, հարուստ Հայաստան, որմէ ոչ մէկը պիտի ուզէ հեռանալ»… Պերճ Զէյթունցեանի խօսքերը մեջբերելով, ծրագրին իր մասնակցութիւնը բերած Արցախի Հանրապետութեան Ազգային Ժողովի «Դաշնակցութիւն» խմբակցութեան անդամ Ռիթա Մնացականեանը շեշտեց, որ «Թեւանիկ» խումբը գալիք հզօր Հայաստանի ուրուագծողն է:

ԱՀ ԱԺ «Դաշնակցութիւն» խմբակցութեան անդամ Ալիոշա Գաբրիէլեանը ծրագրի կարեւորութեան մասին խօսելով` շեշտած է, որ Ուղտասարի նոր սերունդը այսուհետեւ գիւղ մնալու եւ գիւղը շենցնելու կարելիութիւններ ունի:

«Այս ծրագրիը շարունակական է եւ կը նպատակադրէ Արցախի մէջ զարգացնել փոքր առեւտուրը»,- ըսած է Ա.Գաբրիէլեան:

Երեւանցի ու գորիսեցի, արմարւիրցի ու ստեփանավանցի. 17-ամեայ Ուղտասարը մէկ յարկի տակ  համախմբած է ամենաաշխատասէր ու ազնիւ մարդիկ, որոնք քարը քարի վրայ դնելով` հաստատուն քայլերով կը յառաջանան:

«Մեզ պէտք չէ գումար տալ, պէտք է կարելիութիւններ ստեղծել, որ մենք մեր գումարը սեփական քրտինքով վաստկենք: «Թեւանիկ» խումբը իր օգնութեամբ նպաստեց մեր Ուղտասարի զարգացման: Կը վստահեցնենք ձեզ, որ երկու տարիէն «Ուղտասար»ի չրեղէնը միջազգային շուկայի մէջ պիտի յաայտնուի»,- ըսած է Ուղտասարի գիւղապետ Մանուէլ Պետրոսեան:

 

Լուսինէ Թադէոսեան

«Ապառաժ»

Արցախ

Share.

Leave A Reply