ՃԱԱՖԱՐԻ. «ՍՈՒՐԻԱ ԿԸ ՄԵՐԺԷ ԽԱՆ ՇԷԽՈՒՆԻ ՍՊԱՆԴԻՆ ՇՈՒՐՋ ՄԻԱՑԵԱԼ ՀԵՏԱՔՆՆՈՒԹԵԱՆ ՄԱՐՄՆԻՆ ԶԵԿՈՅՑԸ»

0

Երեքշաբթի, 7 Նոյեմբեր 2017-ին, ՄԱԿ-ի մօտ Սուրիոյ մնայուն ներկայացուցիչ դոկտ. Պաշշար ալ Ճաաֆարի ՄԱԿ-ի Միջազգային Անվտանգութեան Խորհուրդի նիստին ընթացքին հաստատած է, որ Սուրիա կը մերժէ ՄԱԿ-ի եւ Քիմիական Զէնքերու Կանխարգիլման Կազմակերպութեան կողմէ Խան Շէխունի մէջ քիմիական զէնքի օգտագործման շուրջ ներկայացուած միացեալ հետաքննութեան զեկոյցը՝ դիտել տալով, որ զեկոյցը կը խեղաթիւրէ ճշմարիտ բոլոր տուեալներն ու փաստերը եւ կ՛ընդգրկէ անորոշ սահմանումներ, որոնց վրայ չի կրնար հիմնուիլ քրէական որեւէ զեկոյց: Ան դիտել տուած է, որ զեկոյցին մէջ 32 անգամ օգտագործուած է «հաւանական է» եւ «հաւանական չէ» բառերը, որոնք  գիտական ոչ մէկ հիմքի վրայ հիմնուած են:

Ճաաֆարի եզրափակելով ըսած է, որ Սուրիա կտրականապէս կը մերժէ զեկոյցը, որովհետեւ ան իրականութեան չի համապատասխաներ եւ կը հերքէ Խան Շէխունի սպանդը:

«Պիտի շարունակենք ահաբեկչութեան դէմ մեր պատերազմը… Մեր զաւակներուն անգին արեամբ եւ միջազգային օրէնքը յարգող մեր բարեկամ երկիրներուն աջակցութեամբ պիտի վերականգնենք մեր երկիրը», յայտնած է Ճաաֆարի:

Share.

Leave A Reply