ՄԵՐ ՀԱՄԱՅՆՔԸ ՓՈՔՐ Է, ԲԱՅՑ՝ ԶՕՐԱՒՈՐ. ԻՆՏԻԱՆԱՅԻ ՀԱՅ ԴԱՏԻ ՅԱՆՁՆԱԽՈՒՄԲԻ ՂԵԿԱՎԱՐ

0

ԵՐԵՒԱՆ, «Նիուզ».- Ինտիանայի Հայ Դատի Յանձնախումբի ղեկավար Սեդա Արզումանեան յայտնած է, թէ Ինտիանայի կողմէ Հայոց Ցեղասպանութեան ճանաչումը ակնկալելի էր:

«Ինտիանայի նահանգապետին որոշումը՝ Հայոց Ցեղասպանութեան ճանաչման մասին, կը վկայէ Ամերիկայի Հայ Դատի Յանձնախումբին տասնամեակներու աշխատանքին մասին՝ թէ՛ Միացեալ Նահանգներու այլ նահանգներու մէջ եւ թէ Ինտիանայի: Ինտիանայի հայկական համայնքը փոքր է, բայց զօրաւոր է իր հաւատքով ու գործունէութեամբ, որ ուղղուած է Հայոց Ցեղասպանութեան մասին քարոզչութեան եւ ի վերջոյ՝ ճանաչման», ըսած է ան:

Սեդա Արզումանեան վստահեցուցած է, որ Ինտիանայի Հայ Դատի Յանձնախումբը պիտի շարունակէ իր աշխոյժ աշխատանքը՝ դաշնակցային մակարդակով Հայոց Ցեղասպանութիւնը ճանչնալու նպատակին հասնելու համար։

«Այսօր արդէն Ինտիանան ներկայացնող ծերակուտական Անտրէ Քարսըն միացած է Ներկայացուցիչներու տան մէջ շրջանառուող Հայոց Ցեղասպանութեան ճանաչման մասին թիւ 220 բանաձեւի զօրակցողներու շարքին, եւ յոյս ունինք, որ շատեր եւս պիտի հետեւին անոր օրինակին», աւելցուցած է Արզումանեան:

Աւելցնենք, որ Ինտիանայի նահանգապետ Էրիք Հոլքոմ Նոյեմբեր 6-12ի շաբաթը յայտարարած է «Հայութեան իրազեկման շաբաթ»:

Հայ Դատի ներկայացուցիչին խօսքով՝ յառաջիկային պիտի կազմակերպուի «Խոստումը» ֆիլմին հանրային ցուցադրութիւնը, ինչպէս նաեւ կը նախատեսուին Արցախի ազատագրական պայքարին եւ Սումկայիթի ջարդերու 30-րդ տարելիցին նուիրուած ձեռնարկներ :

«Ինտիանայի համայնքը իր աշխոյժ մասնակցութիւնը պիտի բերէ Ամերիկայի Հայ Դատի Յանձնախումբին ղեկավարութեամբ քաղաքական այլ առաջնահերթութիւններ առաջ տանելու գործին, ինչպիսիք են՝ Ամերիկա-Հայաստան առեւտրատնտեսական յարաբերութիւններու զարգացումը եւ խորացումը, Արցախի ճանաչման եւ ապահովութեան երաշխաւորումը, Մերձաւոր Արեւելքի քրիստոնեաներու պաշտպանութիւնը եւ այլն», ըսած է Արզումանեան:

Յիշեցնենք, որ Ինտիանան Ամերիկայի 48-րդ նահանգն է, որ կը ճանչնայ Հայոց Ցեղասպանութիւնը:

Share.

Leave A Reply