2018-ԻՆ ՀԱՅԱՍՏԱՆԻ ՄԷՋ ՏԵՂԻ ՈՒՆԵՆԱԼԻՔ 3 ՄԵԾ ԻՐԱԴԱՐՁՈՒԹԻՒՆՆԵՐՈՒՆ ՆԱԽԱՊԱՏՐԱՍՏԱԿԱՆ ԱՇԽԱՏԱՆՔՆԵՐՈՒՆ ՇՈՒՐՋ ԽՈՐՀՐԴԱԿՑՈՒԹԻՒՆ

0

Շաբաթ, 11 Նոյեմբերին վարչապետ Կարէն Կարապետեանի գրասենեակին մէջ տեղի ունեցած է 2018-ին Հայաստանի մէջ տեղի ունենալիք 3 մեծ իրադարձութիւններուն` Ֆրանսախօս Երկիրներու Վեհաժողովի, Հայաստանի Հանրապետութեան եւ մայիսեան հերոսամարտերու 100-ամեակի եւ Երեւանի հիմնադրման 2800-ամեակի նախապատրաստական աշխատանքներուն շուրջ խորհրդակցութիւն:

Հայաստանի արտաքին գործոց նախարար Էդուարդ Նալպանտեան զեկուցում ներկայացուցած է Ֆրանսախօս Երկիրներու Միջազգային Կազմակերպութեան 17-րդ վեհաժողովի նախապատրաստման եւ  կազմակերպման շուրջ: Երեւանի քաղաքապետի տեղակալ Արամ Սուքիասեան ներկայացուցած է մայրաքաղաքի հիմնադրման 2800-ամեակի շրջագիծին մէջ նախատեսուող ձեռնարկները եւ  նախապատրաստական աշխատանքներուն ընթացքը: Հայաստանի Հանրապետութեան կառավարութեան աշխատակազմի ղեկավար Վահէ  Ստեփանեան, իր կարգին, զեկուցած է Հայաստանի Հանրապետութեան եւ մայիսեան հերոսամարտերու 100-ամեակին նուիրուած ձեռնարկներու նախապատրաստական աշխատանքներուն մասին: Քննարկուած են տարբեր կազմակերպչական հարցեր եւ առաջարկներ:

Վարչապետը, ընդգծելով 2018-ին Հայաստանի մէջ տեղի ունենալիք այս երեք մեծ իրադարձութիւններուն կարեւորութիւնը, շեշտած է, որ անոնք պէտք է կազմակերպուին բարձր մակարդակով եւ պատշաճ: Անդրադառնալով Ֆրանսախօս Երկիրներու Վեհաժողովին` վարչապետ Կարէն Կարապետեան յանձնարարած է շահագրգիռ նախարարութիւններուն ըլլալ աշխոյժ եւ պատասխանատու ընդհանուր կազմակերպչական աշխատանքներով: «Իւրաքանչիւրը իր գործով պէտք է ներգրաւուած ըլլայ կազմակերպչական բոլոր հոլովոյթներուն մէջ, եւ համապատասխան աշխատանքային խումբերը պէտք է կանոնաւոր, առարկայական եւ համակարգուած աշխատին այդ ուղղութեամբ», յայտնած է կառավարութեան ղեկավարը:

Վարչապետը յանձնարարած է մէկ շաբթուան ընթացքին ամփոփել 3 իրադարձութիւններուն շուրջ առաջարկները, յստակեցնել նախատեսուող աշխատանքները եւ ներկայացնել յստակ ծրագիրներ:

Share.

Leave A Reply