ՀՅԴ ՀԵՄ. «ՈՒՍԱՆՈՂՆԵՐՈՒ ԶԻՆՈՒՈՐԱԳՐՄԱՆ ՕՐԻՆԱԳԻԾԻ ՓՈՓՈԽՈՒԹԻՒՆՆԵՐԸ ԽՈՉԸՆԴՈՏ ՉԵՆ ԿՐՆԱՐ ՀԱՆԴԻՍԱՆԱԼ ԳԻՏՈՒԹԵԱՄԲ ԶԲԱՂՈՒԵԼՈՒ ԳՈՐԾԻՆ»

0

ՀՅԴ Հայաստանի Երիտասարդական Միութիւնը 10-12 Նոյեմբեր 2017-ին  Երեւանի մէջ կազմակերպած էր համահայաստանեան երիտասարդական կառոյցներու ներկայացուցիչներու հաւաք:

Հաւաքին կը մասնակցէին Հայաստանի տարբեր մարզերուն մէջ գործող ՀՅԴ ՀԵՄ-ի մասնաճիւղերու շուրջ 60 անդամներ: Հաւաքի մասնակիցները ներկայացուցին իրենց միամեայ գործունէութեան զեկոյցները՝ հանդիպելով կուսակցական եւ քաղաքական գործիչներու հետ, քննարկելով երիտասարդութիւնը յուզող շարք մը հարցեր:

Սեմինար-քննարկումներու ընթացքին առաջադրուած նոր մօտեցումներու եւ գաղափարներու արդիւնքով, մասնակիցները կը նախատեսեն մշակել գործունէութեան նոր ծրագիրներ, որոնք կը միտին մարզերուն մէջ երիտասարդութեան ազգային եւ հանրային շահերու պաշտպանութեան շուրջ համախմբումին ու երիտասարդութեան առջեւ ծառացած արդի խնդիրներու լուծումին:

Կարեւոր նկատելով պարտադիր զինուորական ծառայութեան նոր օրինագիծի սահմանափակումներուն դէմ կազմակերպուած ուսանողական վերջին ցոյցերն ու դասադուլները, ՀՅԴ ՀԵՄ-ի համահայաստանեան դիւաններու հաւաքը քննարկեց նաեւ ստեղծուած իրավիճակը՝ արձանագրելով հետեւեալը.

  1. Ամիսներ առաջ, ՀՀ Պաշտպանութեան Նախարարութեան նախաձեռնութեամբ տեղի ունեցած «Ես եմ» եւ «Պատիւ ունիմ» ծրագիրի հանրային քննարկումներուն ընթացքին, ՀԵՄ շարքերէն հասած են շարք մը տեսակէտներ եւ մտահոգութիւններ, զոր քննարկելու նպատակով միութիւնը նախաձեռնած է ընկերային հաւաքներու՝ հրաւիրելով Ազգային Ժողովի ՀՅԴ խմբակցութեան եւ համապատասխան ոլորտներու մէջ փորձառութիւն ունեցող ընկերներ:

 

Քննարկումներուն ընթացքին հետաքրքրութիւն ցուցաբերած երիտասարդները ստացած են իրենց յուզող հարցերուն պատասխանները:

 

  1. Քննարկումներուն արդիւնքով կազմուած է առաջարկներու ծրար, որ ներկայացուած է խորհրդարանին մէջ ՀՅԴ խմբակցութեան կողմէ ու ներառուած կուսակցութեան դիրքորոշումներուն մէջ:

 

  1. Ողջունելով ուսանողութեան եւ երիտասարդութեան քաղաքացիական եւ քաղաքական աշխուժութիւնը, գնահատելով երկրին մէջ ընթացող բարեփոխումներու եւ ներքաղաքական իրադարձութիւններու հանդէպ երիտասարդութեան ուշադրութիւնը, կը յորդորենք դասադուլի դիմող ուսանողները՝ Հայաստանի պաշտպանութեան եւ կրթութեան ոլորտին մէջ ընթացող բարեփոխումներուն անդրադառնալ աւելի ամբողջական եւ ընդհանուր՝ հիմնուելով պետութեան դիմաց ծառացած ազգային անվտանգութեան եւ գիտակրթական հասարակութեան ձեւաւորման առաջնահերթութիւններուն վրայ: Այս առումով, զինուորական ծառայութեան առնչութեամբ առաջադրուող փոփոխութիւնները ամենեւին խոչընդոտ չեն կրնար հանդիսանալ ուսանողներուն՝ գիտութիւնը կատարելագործելու համար, քանի որ կ’առաջադրուին նաեւ շարք մը այլընտրանքային լուծումներ, որոնք կ’ընդլայնեն ուսանողներու զինուորական ծառայութեան ընտրութեան կարելիութիւնները:

 

  1. Պետութիւն-քաղաքացիական հասարակութիւն, պետութիւն-երիտասարդութիւն երկկողմանի պատասխանատուութեան եւ հոգատարութեան առկայութիւնը պետութեան ամրութեան կարեւորագոյն գրաւականներէն են: Այս գաղափարի համընդհանուր ընկալումն ու գործադրումը կը հանգեցնէ կուռ պետութեան եւ բարձր իրաւագիտակցութեան մակարդակ ունեցող հասարակութեան ձեւաւորման: Ըստ այդմ, կ’առաջարկենք շահագրգիռ կողմերու ներկայացուցիչներէն կազմել նախաձեռնող խումբ մը եւ սկսիլ աշխոյժ ուսանողական-երիտասարդական քննարկումներ՝ «Բարեփոխումներն Ու Երիտասարդութեան Մօտեցումները» խորագիրով:

 

  1. Սոյն առաջարկը ընդունելու պարագային ՀՅԴ ՀԵՄ պատրաստ է իր կարելիութիւններով նպաստելու այդ քննարկումներու կազմակերպական աշխատանքներուն, ինչպէս նաեւ քննարկումներուն արդիւնքով առաջադրուած տեսակէտերու գործադրման կառուցողական քայլերուն:

 

 ՀՅԴ Հայաստանի Երիտասարդական Միութեան

Կեդրոնական Վարչութիւն

13 Նոյեմբեր 2017

Երեւան 

 

 

Share.

Leave A Reply