ԹՐԱՄՓ ԵՒ ՓՈՒԹԻՆ. « ԱՆՀՐԱԺԵՇՏ Է ՅԱՐԳԵԼ ՍՈՒՐԻՈՅ ԻՆՔՆԻՇԽԱՆՈՒԹԻՒՆԸ ԵՒ ՏԱՐԱԾՔԱՅԻՆ ԱՄԲՈՂՋԱԿԱՆՈՒԹԻՒՆԸ»

0

«Սփութնիք» կը հաղորդէ, որ Երկուշաբթի, 13 Նոյեմբեր 2017-ին, Վիեթնամի մէջ գումարուած Էփէք գագաթնաժողովի աւարտին, ԱՄՆ-ի եւ Ռուսիոյ նախագահներ Տանըլտ Թրամփ եւ Վլատիմիր Փութին միացեալ յայտարարութեամբ մը հաստատած են, թէ յանձնառու են պահպանելու Սուրիոյ ինքնիշխանութիւնը, տարածքային ամբողջականութիւնը, խաղաղութիւնն ու աշխարհիկ դիմագիծը՝ յոյս յայտնելով սուրիական տագնապի քաղաքական լուծման հասնիլ Ժընեւի շրջագիծէն ներս, ՄԱԿ-ի Անվտանգութեան Խորհուրդի 2254 թուակիր օրէնքին համաձայն:

Նախագահները սուրիական բոլոր կողմերուն կոչ ուղղած են մասնակցելու Ժընեւի բանակցութիւններուն՝ վերստին հաւաստիացնելով, որ պիտի պայքարին ՏԱՀԵՇ-ի զինեալներուն դէմ մինչեւ այդ կազմակերպութեան ամբողջական կազմալուծումը:

Անոնք կարեւոր համարած են Սուրիոյ ժողովուրդին մարդկային ծանր պայմանները նուազեցնող ճիգերը՝ կոչ ուղղելով ՄԱԿ-ի անդամ երկիրներուն սատարելու Սուրիոյ ժողովուրդին ուղղուած մարդասիրական օժանդակութեան, անհրաժեշտ համարելով Միջին Արեւելքի մէջ անվտանգութեան վերահաստատումը:

Յայտարարութեան մէջ անդրադարձ կատարուած է Սուրիոյ մէջ լարուածութեան մեղմացման գօտիներու պահպանման եւ երկրի հարաւարեւմտեան շրջանին մէջ եւս նման գօտիի մը ստեղծման:

Share.

Leave A Reply