«ՀՐԱՆԴ ՏԻՆՔ» ՀԻՄՆԱԴՐԱՄԸ ՀՐԱՊԱՐԱԿԱԾ Է ԹՐՔԱԿԱՆ ՄԱՄՈՒԼԻՆ ՄԷՋ ԱՏԵԼՈՒԹԵԱՆ ԴՐՍԵՒՈՐՄԱՆ ՄԱՍԻՆ ՆՈՐ ԶԵԿՈՅՑ. ՀԱՅԵՐԸ ԹԻՐԱԽ ԴԱՐՁԱԾ ԵՆ 247 ՀՐԱՊԱՐԱԿՈՒՄՆԵՐՈՒ ՄԷՋ

0

Սթամպուլի մէջ գործող «Հրանդ Տինք» հիմնադրամը հրապարակած է թրքական մամուլին մէջ ատելութեան դրսեւորումներու մասին իր զեկոյցը: Ինչպէս կը հաղորդէ «Տեմոքրաթհապէր» կայքը, ըստ հիմնադրամի դիտարկումներուն՝ վերջին ամիսներուն ազգայնական մամուլին մէջ առաւելապէս թիրախ դարձած են հրեաներն ու սուրիացի ներգաղթեալները:

Զեկոյցը կը փաստէ, որ 2017-ի Մայիսէն մինչեւ Օգոստոս ժամանակահատուածին մէջ թրքական մամուլին մէջ հրապարակուած է ցեղային եւ կրօնական խումբերու դէմ ատելութեան դրսեւորում պարունակող 1910 լուր եւ յօդուած, որոնց մէջ առկայ եղած է ընդհանուր առմամբ ցեղապաշտական ու ազգայնական բնոյթի 2466 արտայայտութիւն:

Տինքի հիմնադրամի՝ Մամլոյ մէջ ատելութեան դրսեւորումներու մասին նախագիծի աշխատանքային խումբի անդամներուն՝ Ֆունտա Թեքինի, Պենար Էնսարիի, Մերվէ Նեպիօղլուի եւ Էզքի Քանի կողմէ պատրաստուած 146 էջնոց զեկոյցին մէջ ուշադրութիւնը դարձուած է այն փաստին վրայ, որ նման վիճակագրական պատկերի վրայ իրենց ազդեցութիւնը ունեցած են այս ընթացքին տեղի ունեցած Կիպրոսի ժընեւեան համաժողովը, թուրք-յունական ծովային ճգնաժամերը, Պարսից ծոցի երկիրներուն կողմէ Քաթարի շրջափակումը, Պաղեստինի մէջ եղած բախումները, ռոհինճա մահմետականներու դէմ յարձակումները եւ 29 Օգոստոսին Թուրքիոյ մէջ յիշատակուող Տումլուփընարը ճակատամարտին 95-ամեակը:

Ընդհանուր առմամբ այս ամիսներուն ընթացքին մամլոյ մէջ լոյս տեսած է հրեաները թիրախ դարձնող 493 հրապարակում, 472 հրապարակումի մէջ հեղինակները ատելութեան դրսեւորումներ ցուցաբերած են սուրիացի ներգաղթեալներուն նկատմամբ, 256 յօդուած կամ լուր բացասական շեշտադրումով անդրադարձած է Յունաստանի յոյներուն, հայերը թիրախ դարձած են 247 հրապարակումի մէջ, իսկ 212 յօդուած կամ լուր ատելութեամբ նկարագրած են Թուրքիոյ յոյները:

Ատելութեան դրսեւորումները առաւելաբար հնչած են թրքական «Եէնի Աքըթ», «Միլլի Կազեթէ», «Եէնի Մեսաժ», «Եէնի Քոնիա», «Իսթիքլալ» եւ «Պուրսա Սանճաք» պարբերականներուն մէջ:

Share.

Leave A Reply