ՆԱԽԱԳԱՀ ՍԵՐԺ ՍԱՐԳՍԵԱՆ ԱՇԽԱՏԱՆՔԱՅԻՆ ԱՅՑԵԼՈՒԹԵԱՄԲ ԿԸ ՄԵԿՆԻ ՌՈՒՍԻԱ

0

Հայաստանի Հանրապետութեան նախագահի աշխատակազմի հասարակութեան եւ տեղեկատուական միջոցներու հետ կապերու վարչութիւնը կը տեղեկացնէ, որ նախագահ Սերժ Սարգսեան Ռուսաստանի Դաշնութեան նախագահ Վլատիմիր Փութինի հրաւէրով 15 Նոյեմերին աշխատանքային այցելութեամբ կը մեկնի Ռուսաստանի Դաշնութիւն՝ Մոսկուա:

Նախագահ Սարգսեան հանդիպում պիտի ունենայ Ռուսիոյ նախագահ Վլատիմիր Փութինի հետ: Ռազմավարական գործընկեր երկու պետութիւններու ղեկավարները բանակցութիւններու ընթացքին պիտի քննարկեն հայ-ռուսական յարաբերութիւններու օրակարգը եւ երկկողմանի միջպետական կապերու հետագայ ամրապնդումին ու զարգացումին վերաբերող հարցեր: Պիտի անդրադառնան նաեւ Եւրասիական Տնտեսական Միութեան շրջագիծին մէջ համագործակցութեան եւ տարածաշրջանային արդի խնդիրներուն:

Նախագահներ Սարգսեան եւ Փութին պիտի մասնակցին «Ռուսաստանի մէջ Հայաստանի մշակութային օրերու» պաշտօնական բացման հանդիսաւոր արարողութեան, որ նուիրուած է Հայաստանի Հանրապետութեան եւ Ռուսաստանի Դաշնութեան միջեւ դիւանագիտական յարաբերութիւններու հաստատման 25-ամեակին եւ Հայաստանի Հանրապետութեան ու Ռուսաստանի Դաշնութեան միջեւ բարեկամութեան, համագործակցութեան եւ փոխադարձ օգնութեան մասին պայմանագրի ստորագրման 20-ամեակին:

Նախագահ Սարգսեան պիտի այցելէ նաեւ Հայ Առաքելական եկեղեցւոյ Ռուսաստանի եւ Նոր Նախիջեւանի թեմի առաջնորդարան եւ Սուրբ Պայծառակերպութիւն Մայր տաճար, ուր տեղի կ’ունենայ «Ռուսաստանի մէջ Հայաստանի մշակութային օրերու» շրջագիծէն ներս բացուած՝ թեմի հիմնադրման 300-ամեակին նուիրուած «Պիպլիական Երկիր Հայաստան» խորագիրով ցուցահանդէսը, ինչպէս նաև եկեղեցական համալիրի տարածքէն ներս ներկայացուած ժամանակակից հայկական խաչքարերու ցուցահանդէս:

 

Share.

Leave A Reply