ՀՀ ԱԶԳԱՅԻՆ ԺՈՂՈՎԻ 4 ԽՄԲԱԿՑՈՒԹԵԱՆ ՊԱՏԳԱՄԱՒՈՐՆԵՐ ՄԱՍՆԱԿՑԱԾ ԵՆ ԲՆԱՊԱՀՊԱՆՈՒԹԵԱՆ ՆԱԽԱՐԱՐՈՒԹԵԱՆ ԿԱԶՄԱԿԵՐՊԱԾ ԾԱՌԱՏՈՒՆԿԻՆ

0

«Արմէնփրէս» կը տեղեկացնէ, թէ Հայաստանի Հանրապետութեան Բնապահպանութեան Նախարարութեան ենթակայ բնութեան յատուկ տարածքներու մէջ 18 Նոյեմբերին տեղի ունեցած են  աշնանային ծառատունկի աշխատանքներ:

«Հայաստանի Հանրապետութեան Ազգային Ժողովի չորս` ՀՀԿ, ԲՀԿ, ՀՅԴ եւ «Ելք» խմբակցութիւններու պատգամաւորները Հայաստանի Հանրապետութեան Բնապահպանութեան Նախարարութեան աշխատակիցներու հետ ծառատունկ կատարած են «Դիլիջան» ազգային պարկի տարածքին մէջ: Ծառատունկին մասնակցած են Ազգային Ժողովի տարածքային կառավարման, տեղական ինքնակառավարման, գիւղատնտեսութեան եւ բնապահպանութեան հարցերու մշտական յանձնաժողովի նախագահ Վարդեւան Գրիգորեան/ԲՀԿ/,  Ֆինանսավարկային եւ պիւտճէտային հարցերու մշտական յանձնաժողովի նախագահ Գագիկ Մինասեան /ՀՀԿ/, ՀՀԿ խմբակցութեան պատգամաւոր  Շիրակ Թորոսեան, «Ելք» խմբակցութեան պատգամաւոր Լենա Նազարեան,  ՀՅԴ խմբակցութեան քարտուղար Աղուան Վարդանեան, նոյն խմբակցութեան պատգամաւոր  Սուրէն Մանուկեան, Հայաստանի Հանրապետութեան Բնապահպանութեան Նախարարութեան աշխատակազմի, «Դիլիջան» ազգային պարկի, Բնապահպանութեան եւ ընդերքի տեսչական մարմինի տարածքային ստորաբաժանումին, Հայաստանի Հանրապետութեան Ոստիկանութեան Դիլիջանի բաժինի աշխատակիցները: Ծառատունկին մեծ աշխուժութիւն ցուցաբերած են Դիլիջան, Հղարծին, Թեղուտ համայնքներու դպրոցներու, «Այբ» կրթահամալիրի աշակերտները: Վերջիններս պարգեւատրուած են շնորհակալագիրներով, զոր յանձնած են Հայաստանի Հանրապետութեան բնապահպանութեան նախարարն ու Ազգային Ժողովի պատգամաւորները: Պատգամաւորները իրենց շնորհաւորական խօսքերուն մէջ դպրոցականներուն կոչ ուղղած են պահպանելու իրենց շրջապատող հարուստ բնաշխարհը եւ խնամել նոր տունկերը:

 

Հայաստանի Հանրապետութեան բնապահպանութեան նախարար Արծուիկ Մինասեան դպրոցականներուն ուղղուած իր խօսքին մէջ կարեւոր համարեց ծառատունկը ոչ միայն կենսաբազմազանութեան պահպանման եւ վերարտադրման իմաստով, այլեւ հասարակութեան մօտ բնապահպանման մշակոյթի ձեւաւորման անհրաժեշտութեամբ եւ դպրոցականներուն կոչ ուղղեց իրենց շրջապատի աւագ տարիքի ներկայացուցիչները յորդորել զերծ մնալու ապօրինի ծառահատումներէն:

 

Ծառատունկի մասնակիցները «Դիլիջան» ազգային պարկի 2,5 հեքթար տարածքին մէջ տնկած են մօտ 5600 փշատերեւ եւ այլ ծառատեսակներու տնկիներ:

 

Հայաստանի Հանրապետութեան բնապահպանութեան նախարարութեան ենթակայ բնութեան միւս տարածքներուն մէջ 18 Նոյեմբերին ծառապատուած է նաեւ մօտ 3,5 հեքթար տարածք եւ տնկուած 3700 տարբեր տեսականի, որոնց կարգին նաեւ ՀՀ բոյսերու կարմիր գիրքին մէջ գրանցուած ծառատեսակներ:

Ծառատունկի աւարտէն ետք նախարար Արծուիկ Մինասեան  Ազգային Ժողովի պատգամաւորներուն եւ ծառատունկի մասնակիցներուն ծանօթացուցած է  ազգային պուրակներու պահպանման գրասենեակէն ներս տեղակայուած տեղեկատուական կեդրոնի աշխատանքներուն: Կեդրոնէն ուղիղ կապով կը հետեւին ազգային պարկի «Դիլիջան» եւ «Հաղարծին» տեղամասերուն մէջ վերջերս տեղադրուած տեսախցիկներուն, որոնք ապօրինի ծառահատումներու կանխարգիլման  նպատակին կը ծառայեն: «Շամախեան» տեղամասին մէջ ալ նախատեսուած է տեղադրել տեսախցիկներ, եւ այդ գործընթացը կը յետաձգուի այնտեղ արձանագրուած պահակակէտի այրումին դէպքին հետ կապուած քննչական գործողութիւններուն պատճառով, որոնց աւարտէն ետք միայն կարելի կ’ըլլայ այդ տեղամասին մէջ տեղադրել տեսախցիկներ: Ա. Մինասեան յայտնած է, որ ազգային պուրակներէն ներս նախատեսուած է տեղադրել նաեւ ձայնային զգայուն գործիքներ, որոնք կ’արձագանգեն սղոցներու եւ մեքենաներու ձայներուն: Տեսախցիկներու եւ գործիքներու աշխատանքներուն հետեւելու կարելիութիւն կ’ունենան նաեւ տեսչական մարմինի աշխատակիցները, ինչպէս նաեւ իւրաքանչիւր փափաքող: Այդ գործունէութիւնները ուղղուած են ապօրինի ծառահատումներուն դէմ եւ նախատեսուած է զանոնք կիրառել նաեւ բնութեան  պահպանելի մնացեալ բոլոր տարածքներուն մէջ:

Share.

Leave A Reply