ՌՈՒՍՏԱՄԵԱՆ` ԵՏՄ-ԷՆ ԴՈՒՐՍ ԳԱԼՈՒ ՄԱՍԻՆ. «ԿԸ ՔՆՆԱՐԿԵՆՔ ՀԱՐՑ ՄԸ, ՈՐ ԽԱՂԷՆ ԴՈՒՐՍ Է»

0

Հայաստանի Հանրապետութեան Ազգային Ժողովի արտաքին յարաբերութիւններու մշտական յանձնաժողովին կը քննարկուի «Ելք» խմբակցութեան` ԵՏՄ-էն Հայաստանի դուրս գալու առաջարկին Ազգային Ժողովի նիստերու օրակարգի բերելու հարցը: ՀՅԴ-ի տեսակէտը ներկայացուց խմբակցութեան ղեկավար Արմէն Ռուստամեան:

Պատգամաւորը նախ յայտնեց, որ այս հարցը այնքան քննարկուած է, որ բովանդակային վերլուծումներու կարիք չկայ, ապա յայտնեց թէ երկրի ընկերային-տնտեսական խնդիրները կը կապուին ԵՏՄ-ի անդամակցութեան հետ:

«Կապ չենք տեսներ մատնանշուող խնդիրներուն եւ Հայաստանի ԵՏՄ անդամակցութեան միջեւ: Պնդել, որ ընկերային-տնտեսական առումով Հայաստան հետընթաց պիտի ապրի ու ատիկա կապել ԵՏՄ-ի անդամակցութեան հետ, իրականութեան չի համապատասխաներ: Այո, խնդիրներ կան, բայց այդ խնդիրները ԵՏՄ-ի անդամակցութեան հետ կապ չունին», ըսաւ ան:

Ռուստամեան շեշտեց, որ Հայաստանի Հանրապետութիւնը պայմանագիր կնքած է ե՛ւ ԵՏՄ-ի, ե՛ւ ԵՄ-ի հետ, ուրեմն այս պարագային յիշեալ նախագիծը խաղէն դուրս կը մնայ: «Մենք հիմա կը քննարկենք հարց մը, որ խաղէն դուրս է», ըսաւ ան:

Անոր կարծիքով` եթէ եւրոպացի մասնագէտները հակասութիւն տեսնէին ԵՏՄ-ի հետ Հայաստանի անդամակցութեան մէջ, չէին ստորագրեր համապարփակ համաձայնագիրը: «ԵՄ-ի հետ 1200 էջնոց պայմանագիրին մէջ չեմ տեսած ոլորտ մը, որ բաց ձգուած է, եւ եթէ այդ ամէնը կը վերլուծեն եւրոպական մասնագէտները ու չեն տեսներ հակասութիւն, մեզի կը մնայ օգտագործել այս նոր իրողութիւնը եւ ձեռք բերել մեր զարգացման համար նոր միջոցներ», ըսաւ ան:

Ռուստամեան ընդգծեց, որ Հայաստան որդեգրած է խորհրդարանական փորձը, ատով իսկ սահմանած է գործընթաց մը, որ Եւրոպան ալ որդեգրած է: «Իսկ քաղաքական համակարգը հիմնական գործօն է դէպի իրաւական, ժողովրդավարական երկիր, դէպի մարդու իրաւունքներու պաշտպանութիւն: Ատիկա ԵՄ-ը գնահատած է, ուստի Հայաստանի Հանրապետութիւնը ճիշդ ուղղութեամբ կ’ընթանայ, եւ տարածաշրջանի մէջ կ’առանձնանայ նաեւ այս շրջագիծին մէջ», եզրափակեց ան:

Share.

Leave A Reply

This site uses Akismet to reduce spam. Learn how your comment data is processed.