ՀԱՆԴԻՍԱՒՈՐ ՅԻՇԱՏԱԿՈՒՄ «ՍԵՒԱՆԻ ՕՐ»ՈՒԱՆ

0

Կազմակերպութեամբ ՍՕ Խաչի «Սեւան» Մասնաճիւղի Վարչութեան, Չորեքշաբթի, 22 Նոյեմբեր 2017-ի առաւօտ ժամը 10:30-ին, ԱՄԺՏ «Լեւոն Շանթ» սրահէն ներս, շուրջ հարիւր անդամներու ներկայութեան յիշատակուեցաւ «Սեւանի Օր»ը:

Յայտագիրը սկսաւ ՍՕ Խաչի քայլերգով, որմէ ետք բացման խօսք արտասանեց «Սեւան» Մասնաճիւղի ատենապետուհի Մարի Մխճեան, որ բարի գալուստի իր խօսքէն ետք անդրադարձաւ Հալէպի երկարամեայ պատերազմի տարիներուն «Սեւան» Մասնաճիւղի աննահանջ գործունէութեան:

Ան լուսարձակի տակ առաւ հայ կնոջ աննկուն կամքը եւ ստեղծագործ միտքը, որոնց շնորհիւ գործեցին եւ տակաւին կը գործեն մասնաճիւղի խաչուհիները:

Ատենապետուհին փափաք յայտնեց, որ «Սեւան» Մասնաճիւղի շարքերը համալրուին երիտասարդ ոյժերով, ապա բեմ հրաւիրեց Մեղրի Մուշոյեանը, որ նուագէ «Վաղարշապատ»ը (դաշնամուր): Այնուհետեւ Աննա Պարսումեան եւ Վանայ Սէրչէեան արտասանեցին Անդրանիկ Ծառուկեանի «Ուխտ Արարատի» ոտանաւորէն համադրում մը:

Բեմ հրաւիրուեցաւ օրուան բանախօս, փաստաբան Մարիա Գաբրիէլեան:

Ան ներկայացուց Սուրիահայութեան Շտապ Օգնութեան եւ Վերականգնումի Մարմնին մշակած հալէպահայութեան վերականգնումի ծրագիրը` լուսարձակի տակ առնելով անոնց ցարդ իրականացած բաժինը, յատկապէս կեդրոնանալով Հալէպի Շտապ Օգնութեան Գործադիր Մարմնին կողմէ գործատեղիներու վերանորոգութեան ծրագիրներուն եւ այդ ուղղութեամբ տարուող գործնական աշխատանքներուն վրայ: Վերականգնումի նիւթական աշխատանքներուն կողքին բանախօսը անդրադարձաւ բարոյական վերականգնումին` մեծապէս կարեւորելով հալէպահայ համայնքի ամբողջական վերականգնումը:

Զանի Փամպուքեան (Ֆլիւթ), իսկ Ծիլա Թաթուլեան (քանոն) յաջորդաբար հանդէս եկան հայկական կատարումներով:

Ապա բեմէն Խաչիկ Աշճեանի կատարողութեամբ հնչեցին «Աշուղ Եմ» եւ «Սարի Սիրուն Եար» երգերը:

Օրուան եզրափակիչ խօսքը արտասանեց ՍՕ Խաչի Շրջ. Վարչութեան ատենապետուհի Հռիփ Կանանեան, որ շնորհաւորեց Սեւան Մասնաճիւղի նորընտիր վարչութիւնը ու շնորհակալութիւն յայտնեց անոր այս կոկիկ ձեռնարկի կազմակերպման համար: Ան բարձրօրէն գնահատեց բանախօսը` իր տուած ամբողջական տեղեկութիւններուն եւ յստակ ներկայացման համար եւ ներկաներէն խնդրեց, որ իրենց շրջապատին եւս հաղորդեն այս տեղեկութիւնները:

«Այսօրուան նիւթը շատ լաւ յիշեցում մըն է մեզի, որպէսզի իրազեկ դառնանք եւ չթերագնահատենք մեր ազգին տարած աշխատանքն ու զոհողութիւնը», ըսաւ ան:

Ապա նորակազմ վարչութեան եւ անդամներուն ուղղելով իր խօսքը, ուրախութեամբ յայտնեց, թէ. «Բոլոր մասնաճիւղերը պիտի ունենան իրենց յատուկ յիշատակումի օրը, որուն ընթացքին գեղարուեստական յայտագրին հետ միատեղ պիտի պարգեւատրուին երկար տարիներու ծառայութիւն ունեցող անդամուհիները»:

Ատենապետուհին իր խօսքի աւարտին խաչուհիներուն թելադրեց միասնական ոգիով զարգացնել իրենց գործունէութիւնը` յանուն աւելի ծաղկուն ապագայի:

Սարին Հայրապետեան

Share.

Leave A Reply