ՏԵՂԵԿԱՏՈՒԱԿԱՆ ԱՐՀԵՍՏԱԳԻՏՈՒԹԵԱՆՑ (IT) ՀԱՄԱՇԽԱՐՀԱՅԻՆ ՀԱՄԱԺՈՂՈՎԸ՝ ԵՐԵՒԱՆԻ ՄԷՋ

0

Երկուշաբթի, 4 Դեկտեմբերին Հայաստանի Փոխադրամիջոցներու, կապի եւ տեղեկատուական արհեստագիտութեանց նախարար Վահան Մարտիրոսեան ընդունեց Տեղեկատուական Արհեստագիտութեանց եւ Ծառայութիւններու Համաշխարհային Ընկերակցութեան (WITSA) նախագահ Իւոն Չու:

Հանդիպման ընթացքին քննարկուեցան 2019-ին Հայաստանի մէջ ծրագրուած Տեղեկատուական Արհեստագիտութեանց Համաշխարհային Համաժողովի (World Congress on Information Technologies – WCIT) նախապատրաստական աշխատանքներուն վերաբերող հարցեր:

Վահան Մարտիրոսեան յայտնեց, որ համաժողովի կազմակերպումը Հայաստանի մէջ պարտաւորեցնող է եւ կառավարութիւնը պիտի գործադրէ բոլոր ջանքերը զայն բարձր մակարդակով իրականացնելու համար:

Իւոն Չու ընդգծեց, որ Տեղեկատուական Արտհեստագիտութեանց եւ Ծառայութիւններու Համաշխարհային Ընկերակցութեան կողմէ նոյնպէս քայլեր կ՛առնուին՝ համաժողովի նախապատրաստական աշխատանքներուն աջակցելու համար:

Համաժողովին կը նախատեսուի շուրջ 80 երկիրներու 4500-է աւելի պատուիրակներու մասնակցութիւնը:

Share.

Leave A Reply