ԹՈՒՐՔԻԱ ԱՐՑԱԽ ՄԵԿՆԱԾ ԹՈՒՐՔ ՄՏԱՒՈՐԱԿԱՆՆԵՐՈՒՆ ԴԷՄ ՀԵՏԱՔՆՆՈՒԹԻՒՆ ՍԿՍԱԾ Է

0

Ատրպէյճան գտնուող Թուրքիոյ արտաքին գործոց նախարար Մեւլութ Չաւուշօղլու,  լրագրողներու հետ զրոյցի մը ընթացքին խօսած է այն 4 թուրք մտաւորականներուն մասին, որոնք 22 Սեպտեմբերին ճանաչողական այցելութեամբ Արցախի Հանրապետութիւն մեկնած էին:

Յայտնենք, որ Ատրպէյճանի դատախազութիւնը Արցախ այցելած Թուրքիոյ Կանաչներու եւ Ձախակողմեաններու Կուսակցութեան հիմնադիր անդամ, «Անգարայի միտքի հարթակ» հասարակական կազմակերպութեան ղեկավար Ուֆուք Ուրասի, գրող, հրապարակախօս Սայիթ Չեթինօղլուի, լրագրողներ Ալի Պայրամօղլուի եւ Էրոլ Քաթըրճըօղլուի կալանաւորելու որոշում գոյացուցած էր:

«Էրմէնիհապէր»ը՝ վկայակոչելով թրքական «Հապէրլէր» լրատուական կայքը, կը փոխանցէ, թէ Չաւուշօղլու յայտնած է, որ Անգարա մտահոգ է, որովհետեւ վերոյիշեալ անձերը առանց Ատրպէյճանի արտօնութիւնը խնդրելու եւ առանց տեղեակ պահելու թրքական իշխանութիւնները Արցախ մեկնած են:

«Անօրինական կերպով ատրպէյճանական տարածք մուտք գործելը յանցանք է: Մանաւանդ երբ հաշուի առնենք, թէ որքան զգայուն հարց է ղարաբաղեան հիմնահարցը, երբ դեռ յարակից 7 շրջաններն ալ գրաւուած են: Ահա թէ ինչո՛ւ մենք ալ հետաքննութիւն սկսանք, երբ Ատրպէյճանի մէջ հետաքննութիւն սկսաւ Ղարաբաղ մեկնած այս անձերուն նկատմամբ: Անոնք արդէն ցուցմունքներ տալու համար դատարան հրաւիրուեցան, նոյնիսկ հեռաձայնեցին ինծի եւ ըսին, որ չեն գիտակցած, թէ յանցանք կը գործեն: Ես ալ ըսի, որ ատոր համար պէտք է բացատրութիւն տալ ատրպէյճանական իշխանութիւններուն: Վերջապէս, անոնք նախակրթարանի աշակերտներ չեն ու թէեւ ըսած են, որ Ղարաբաղ մեկնելով, այնտեղ պաշտպանած են Ատրպէյճանը, քննադատած «Խոջալուի կոտորածը» եւ Ղարաբաղի հարցով Ատրպէյճանին աջակցող տեսակէտներ յայտնած են, բայց ապօրինի ձեւով այնտեղ երթալը, արդէն յանցանք է», ըսած է Չաւուշօղլու:

Թուրքիոյ արտաքին գործոց նախարարը տեղեկացուցած է, որ Արցախ մեկնած թուրք մտաւորականները նամակով դիմած են Պաքուին եւ յայտնած, որ չեն գիտակցած իրենց սխալին:

«Արդէն իրաւական գործընթացը սկսած է: Թող ատիկա դաս ըլլայ, որպէսզի հետագային ոչ ոք առանց թոյլտուութեան այցելէ Ղարաբաղ, որ կը հանդիսանայ Ատրպէյճանի տարածք: Ատիկա անընդունելի է թէ՛ մեզի, եւ թէ Ատրպէյճանի համար», եզրափակած է Թուրքիոյ արտաքին գործոց նախարարը:

Share.

Leave A Reply