ՀՕՄ-Ը ԿԱՄԱՒՈՐԻ ՕՐՈՒԱՆ ԱՌԻԹՈՎ ԵՐԱԽՏԱԳԻՏԱԿԱՆ ԽՕՍՔ Կ’ՈՒՂՂԷ ԻՐ ԱՆԴԱՄՆԵՐՈՒՆ

0

Հայ Օգնութեան Միութիւնը կը տօնէ Համաշխարհային Կամաւորի Օրը առ ի գնահատանք այն բոլոր կամաւորներուն եւ ընկերներուն, որոնք իրենց անսակարկ նուիրումով, նիւթապէս եւ բարոյապէս նեցուկ կը կանգնին այլազան աշխատանքներու՝ գաղութի եւ հայրենիքի բարելաւման համար:

Այս առիթով, Կեդրոնական Վարչութիւնը իր երախտագիտական խօսքը կ՛ուղղէ իր անդամներուն, որոնք անձնուրաց ոգիով յառաջ կը տանին բարեսիրական գործը ու կարելի կը դարձնեն որ այս կազմակերպութիւնը նորանոր յաջողութիւններ արձանագրէ:

Քաջ կը գիտակցինք, թէ մեր կազմակերպութեան ոյժը կախեալ է մեր այն ընկերներէն, որոնք ամենայն պարտաճանաչութեամբ, նամանաւա՛նդ անշահախնդրութեամբ, գործուն մասնակցութիւն կը բերեն իրենց շրջապատին, գաղութին ու հայրենիքին բարօրութեան աշխատանքներուն: Անոնց նուիրեալ ու անսակարկ ներդրումը մղիչ ուժ կը դառնայ, որուն շնորհիւ մեր կառոյցները կը հզօրանան, համայքները կը կազմակերպուին եւ հայրենիքը կը յառաջդիմէ:

ՀՕՄ-ը, մէ՛կ դարէ աւելի կրցած է իր աշխատանքները տանիլ շնորհիւ տիպար ՀՕՄ-ականներուն, որոնք անսակարկօրէն ծառայեցին Հայ Ժողովուրդին՝ կարիքաւորներուն նուիրաբերելով իրենց ժամանակը, ոյժն ու կորովը՝ յանուն միութեանս ազգանուէր առաքելութեան: Այսօր, աւելի քան երբեք, վստահ ենք որ ՀՕՄ-ը պիտի շարունակէ մնալ պատնէշի վրայ իր աշխարհածաւալ կամաւոր բանակով:

Կամաւորի Օրուան առթիւ, կո՛չ կ՚ուղղենք բոլորի՛ն, որ իրենք ալ իրենց մաս կազմեն հայակերտ այն կազմակերպութիւններուն, որոնք վճռած են մնալ ժողովուրդին կողքին՝ կառչած մնալով ազգային մեր մեր վեհ տեսլականներուն:

ՀՕՄ-ի Կեդրոնական Վարչութիւն
4 Դեկտեմբեր 2017

Share.

Leave A Reply