ԱՂՈՒԱՆ ՎԱՐԴԱՆԵԱՆ. «ՀՅԴ-Ն 2018-Ի ՊԵՏԱԿԱՆ ՊԻՒՏՃԷԻՆ ՎԵՐԱԲԵՐԵԱԼ 8 ԱՌԱՋԱՐԿ ՆԵՐԿԱՅԱՑՈՒՑԱԾ Է»

0

Հայաստանի Հանրապետութեան Ազգային Ժողովի ՀՅԴ խմբակցութեան քարտուղար Աղուան Վարդանեան «Թերթ»-ին հետ զրոյցի մը ընթացքին ըսաւ, որ ՀՅ Դաշնակցութիւնը 2018-ի պետական պիւտճէի վերաբերեալ առաջարկներ ներկայացուցած է:

Ան հերքեց մամուլի հրապարակումները այն մասին, որ Կարէն Կարապետեանի կառավարութիւնը մերժած է ՀՅԴ-ի ներկայացուցած բոլոր առաջարկները:

«Առաջարկներ կատարելու ժամկէտը անցած է, մենք առաջարկներ կատարած ենք արդէն: Բայց պիւտճէի ամփոփաթերթիկը տակաւին չէ ներկայացուած, երբ  ըլլայ` կը տեսնէք, կը համոզուիք: Մամուլը շատ բան կրնայ գրել եւ անոր մէջ տեսնել բաներ, որոնք իրականութեան մէջ գոյութիւն չունին: Ձեր ըսած հրապարակումը ճիշդ այդպիսին է», ըսաւ  Աղուան Վարդանեան:

Պատգամաւորը յայտնեց, որ ՀՅԴ-ն իսկապէս 8 առաջարկ ներկայացուցած է, բայց «ո՞վ ըսաւ, որ անոնք մերժուած են»:

Պատասխանելով այն հարցումին, թէ ի՞նչ առաջարկներ ներկայացուցած է Դաշնակցութիւնը, Աղուան Վարդանեան պատասխանեց. «Պիւտճէի  ծանրաբեռնուածութիւնն ու լարուածութիւնը հասկնալով մենք շատ փոքր առաջարկներ կատարած էինք, որոնք կը վերաբերէին քանի մը  համայնքներու: Խօսքը Խաչիկ սահմանամերձ համայնքի խնդիրներու  մասին է, փոքր խնդիրներու մասին է` Արարատի, Գեղարքունիքի եւ Երեւանի մարզերուն մէջ: Կը կարծեմ, որ 8 առաջարկէն առնուազն կէսը լուծումներ կը գտնեն: Առաջարկներու ընդունման ժամկէտը չէ  աւարտած: Լիայոյս եմ, որ մեր կառավարութիւնը մեր առաջարկներուն մէկ մասը առնուազն յաջորդ տարի պիտի կարենայ իրագործել»:

Share.

Leave A Reply