ԽՕՍՔԻ ԵՒ ՄԱՄՈՒԼԻ ԱԶԱՏՈՒԹԻՒՆԸ ՅԱՃԱԽ «ԿԸ ԲՌՆԱԲԱՐՈՒԻ»  ԹՈՒՐՔԻՈՅ ՄԷՋ. ԹՈՒՐՔԻԱ ՄՐՑԱՆԱԿԱԿԻՐ Է

0

«Պի. Պի. Սի.»ի թրքական հաղորդումներու բաժինը կը տեղեկացնէ, որ 2006-2016 թուակնններուն ընթացքին աշխարհի մէջ մամուլի եւ խօսքի ազատութիւնը ամէնէն շատ ոտնահարուած է Թուրքիոյ մէջ:

«Պի. Պի. Սի.»ն այս լուրը հաղորդած է` հիմնուելով մարդու իրաւունքներու հարցերով զբաղող «Article 19» եւ «V-Dem» ընկերային-քաղաքական կառոյցներուն կատարած հետազօտութեան վրայ:

Հետազօտութիւնը կատարուած է 172 երկրի մէջ, որուն ընթացքին լուսարձակի տակ առնուած են իշխանամէտ լրատուամիջոցները, օրէնքի խախտումները, համացանցի սահմանափակումները, արդարադատութեան, լրագրողներու նկատմամբ կիրառուող ճնշումները, հասարակական խաւերու եւ սեռերու միջեւ անհաւասարութեան ու նմանատիպ այլ ոլորտները:

Ուսումնասիրութեան հիման վրա կազմուած զեկոյցին մէջ հեղինակները մտահոգութիւն յայտնած են Թուրքիոյ մէջ Էրտողանը քննադատողներուն ուղղուած մեղադրանքներուն եւ սպառնալիքներուն առնչութեամբ: «Ընդդիմադիրները կը պնդեն, որ Ապրիլ ամսուան ընթացքին Թուրքիոյ մէջ 152 ազատազրկուած լրագրող կար: Անցեալ տարուան յեղաշրջման փորձէն ետք, ընդհանուր առմամբ, փակուած է աւելի քան 170 լրատուամիջոց, որուն կարգին՝ թերթեր, համացանցային կայքեր, պատկերասփիւռներ եւ լրատու գործակալութիւններ: Աշխատանքէ հեռացուած է 2500 լրագրող», ըսուած է զեկոյցին մէջ:

Թրքական ընդդիմադիր «Ճումհուրիէթ» թերթի թղթակից Այտըն Էնկին «Պի. Պի. Սի.»ի հետ զրոյցի մը ընթացքին յայտնած է, որ Թուրքիոյ մէջ այլեւս չեն մնացած լրատուական այնպիսի ծառայութիւններ, որոնց նկատմամբ կարելի է գրաքննութիւն կիրառել:

Աւելցնենք, որ, ըստ զեկոյցին` 2006-2016 տարիներուն, խօսքի ազատութեան ոտնահարումները սաստկացած են նաեւ Պրազիլի, Եգիպտոսի, Լեհաստանի, Վենեզուէլլայի եւ Պանկլատէշի մէջ:

Share.

Leave A Reply