ՀԱՅԱՍՏԱՆ ԱՇԽԱՐՀԻ ԱՄԷՆԷՆ ՌԱԶՄԱԿԱՆԱՑԱԾ ԵՐԿԻՐՆԵՐՈՒ ՑԱՆԿԻՆ ՎՐԱՅ՝ 3-ՐԴԸ

0

Պոննի Փոփոխութեան Միջազգային Կեդրոնը (BICC) հրապարակած է Մաքս Մուչլըրի ուսումնասիրութեամբ՝ համաշխարհային ռազմականացման իր տարեկան զեկոյցը եւ աշխարհի ամենառազմականացած երկիրներու ցանկը։

2016-ի տուեալներու համեմատ 2017-ի ցանկին վրայ Հայաստան յատկանշական ոստում մը կատարած է՝ նախորդ տարուան արդիւնքներուն բաղդատած, 21-րդ դիրքէն 3-րդ դիրքի բարձրանալով, մինչ Ատրպէյճան նախորդ տարուան 6-րդ դիրքէն իջած է 11-րդ դիրքի։ Վրաստան կը գրաւէ 55-րդ դիրքը։

Հայաստան կը հանդիսանայ Եւրոպայի ամենառազմականացած երկիրը, իսկ Թուրքիա կը գրաւէ 25-րդ դիրքը։

Ուսումնասիրութեան մէջ կը շեշտուի, որ յատկապէս Սէուտական Արաբիոյ, Օմանի, Պահրէյնի եւ Ատրպէյճանի պարագային, քարիւղի միջազգային գինի անկումը պատճառ դարձած է, որ ռազմական մարզին տրամադրուող գումարները համեմատաբար նուազին։ Հոն նաեւ յիշուած է, որ Արցախի ձգձգուող հակամարտութեան պատճառով՝ Հայաստան եւ Ատրպէյճան կը շարունակեն հսկայ գումարներ տրամադրել ռազմական մարզին։

Կեդրոնը ամենառազմականացուած պետութիւնը նկատած է Իսրայէլը, իսկ ցանկին վրայ երկրորդ տեղը գրաւած է Սինկափուրը: Առաջատարներու տասնեակը կ՛ամբողջացնեն Հայաստանը, Ռուսիան, Հարաւային Քորէան, Քուէյթը, Յորդանանը, Կիպրոսը, Յունաստանն ու Պրունէյը: Միացեալ Նահանգները կը գրաւէ 31-րդ դիրքը եւ կը հանդիսանայ աշխարհի տարածքին ռազմական մեծագոյն ամավարկը ունեցող երկիրը՝ 611 միլիառ տոլարով, ինչ որ ռազմական նպատակներու համար տրամադրուող համաշխարհային ընդհանուր գումարին 39 տոկոսն է։

«Միջին Արեւելքի ամենառազմականացած երկիրները» ցանկին վրայ, Իսրայէլին, Քուէյթին եւ Յորդանանին կը յաջորդեն՝ Օմանը (13-րդ), Պահրէյնը (15-րդ), Սէուտական Արաբիան (17-րդ), Լիբանանը (20-րդ), Արաբական Միացեալ Էմիրութիւնները (21-րդ), Իրանը (22-րդ) եւ Եգիպտոսը (28-րդ)։

Ցանկը պատրաստելու ընթացքին նկատի կ՛առնուին 151 երկիրներու մէջ ռազմական մարզին համար ծախսուած գումարները, Տեղական ընդհանուր արտադրութիւնը (GDP), բնակչութեան թիւը եւ շարք մը այլ ազդակներ։ Կեդրոնը այս հետազօտութիւնները կը կատարէ 1990-էն սկսեալ: Անոր համար կ՛օգտագործուին Սթոքհոլմի Համաշխարհային տագնապներու հետազօտման հիմնարկի, Դրամական միջազգային հիմնադրամի, Առողջապահութեան համաշխարհային կազմակերպութեան եւ շարք մը այլ տուեալներ:

Share.

Leave A Reply