ՀՈԳԵՀԱՆԳՍՏԵԱՆ ՊԱՇՏՕՆ՝ Ի ՅԻՇԱՏԱԿ ՀԱՅԱՍՏԱՆԻ ԵՐԿՐԱՇԱՐԺԻ ԶՈՀԵՐՈՒՆ

0

Կիրակի, 10 Դեկտեմբեր 2017-ի առաւօտեան ժամը 10։30ին, Հալէպի Նոր Գիւղ շրջանին մէջ գտնուող Ս. Գրիգոր Լուսաւորիչ եկեղեցւոյ մէջ մատուցուեցաւ Ս. եւ Անմահ Պատարագ, զոր մատուցեց Տէր Խորէն Քահանայ Պէրթիզլեան։ Ս. Պատարագի աւարտին, ներկայութեամբ եկեղեցւոյ Թաղականութեան եւ հաւատացեալ ժողովուրդին, եկեղեցւոյ շրջափակին մէջ գտնուող երկրաշարժի զոհերու յուշակոթողին դիմաց տեղի ունեցաւ հոգեհանգստեան արարողութիւն՝ 7 Դեկտեմբեր 1988-ին պատահած Հայաստանի աղէտալի երկրաշարժի զոհերուն 29-րդ տարելիցին առիթով։

Տէր Խորէն իր քարոզին մէջ յիշեց աղէտը, որուն զոհ գացին անմեղ մեր հայրենակիցները, աղօթեց անոնց հոգւոյն խաղաղութեան համար, ապա շեշտեց յոյսով ապրելուն, մեղքին եւ կեղծիքին դէմ պայքարելուն անհրաժեշտութիւնը։

Ան Աստուծոյ փրկութեան կանչը ընդունիլը անյետաձգելի նկատեց, որպէսզի երկրաւոր կեանքի ընթացքին հաւատացեալը ըլլայ եկեղեցւոյ արժանաւոր անդամ։ Ապա դիտել տուաւ, որ քրիստոնեան կ՚աշակերտի եւ կը հետեւի Աւետարանի ուսուցումներուն՝ քաջ գիտնալով, որ Աստուծոյ շնորհքը ընդունողը մեղքին եւ մոլութիւններուն անձնատուր պէտք չէ ըլլայ, այլ իր սէրը պէտք է արտայայտէ շարունակ,
բոլոր առիթներուն եւ պայմաններուն, որպէսզի անոր հաւատքը վաւերական պատկեր ստանայ։

Share.

Leave A Reply

This site uses Akismet to reduce spam. Learn how your comment data is processed.