ՆԱԽԱԳԱՀ ԱՍԱՏ ԼԱԹԱՔԻՈՅ ՀԸՄԷՅՄԻՄ ՌԱԶՄԱԿԱՅԱՆԻՆ ՄԷՋ ՀԱՆԴԻՊՈՒՄ ՈՒՆԵՑԱՒ ՓՈՒԹԻՆԻ ՀԵՏ. ՍՈՒՐԻՈՅ ԺՈՂՈՎՈՒՐԴԸ ՊԻՏԻ ՉՄՈՌՆԱՅ ՌՈՒՍ ԶԻՆՈՒՈՐՆԵՐՈՒՆ ԶՈՀՈՂՈՒԹԻՒՆԸ

0

 

Երկուշաբթի, 11 Դեկտեմբեր 2017-ի առաւօտ, Սուրիոյ նախագահ Պաշշար ալ Ասատ հանդիպում ունեցաւ Լաթաքիոյ Հըմէյմիմ ռազմակայան ժամանած Ռուսիոյ նախագահ Վլատիմիր Փութինի հետ:

Նախագահները Ռուսիոյ Դաշնութեան պաշտպանութեան նախարարին եւ սուրիական բանակի շտապի պետին ներկայութեամբ շրջեցան Հըմէյմիմ ռազմակայանին մէջ եւ վերանայեցան այնտեղ տեղաւորուած ռուսական ուժերուն: Շրջագայման ընթացքին Փութին հրահանգեց ռուսական զօրքին նախապատրաստուիլ աստիճանաբար դուրս գալու Սուրիայէն:

Փութին ռուս զինուորներուն դիմաց հանդէս գալով յայտարարեց. «Կը հրահանգեմ Պաշտպանութեան Նախարարութեան եւ շտապի պետին սկսելու ռուսական զօրքը Սուրիայէն դուրս բերելու նախապատրաստական աշխատանքին եւ իր մշտական դիրքերուն վրայ տեղադրելու զայն: Այնուհետեւ կը հաւաստիացնեմ, որ եթէ ահաբեկիչները կրկին յայտնուին Սուրիոյ մէջ, ապա մենք աննախադէպ հարուած պիտի հասցնենք անոնց»:

Իր կարգին Սուրիոյ նախագահը ըսաւ, որ յառաջիկայ սերունդները եթէ կարդան Սուրիոյ պատերազմին պատմութիւնը, պիտի չզանազանեն ռուս եւ սուրիացի նահատակները: Երկու կողմերու հերոսներուն սխրանքները պիտի ուրուագծեն ահաբեկչութեան դէմ ամենավսեմ պայքարը, որուն ընթացքին ռուսական արիւնը սուրիական արեան միախառնուելով մաքրագործեց մեր հողը այն սրբապիղծ ահաբեկիչներէն, որոնք նկրտեցան մեր հայրենիքը քանդելու համար:

Նախագահ Ասատ իր խօսքը ուղղելով Ռուսիոյ նախագահին ըսաւ. «Սուրիա Ձեր այցելութիւնը առիթ է խորհրդակցելու ահաբեկչութեան դէմ մեր միասնական պայքարի երկրորդ փուլին, ինչպէս նաեւ սուրիական ճգնաժամի քաղաքական լուծման շուրջ»:

Սուրիոյ նախագահը շնորհակալութիւն յայտնեց նախագահ Փութինին՝ Սուրիոյ մէջ ահաբեկչութեան դէմ պայքարին Ռուսիոյ մասնակցութեան համար՝ շեշտելով, որ Սուրիոյ ժողովուրդը երբեք պիտի չմոռնայ ռուս զինուորներուն զոհողութիւնը, մանաւանդ որ ահաբեկչութեան դէմ պայքարին մէջ անոնց արիւնը միախառնուեցաւ սուրիական բանակի նահատակներուն արեան ու ոռոգելով Սուրիոյ հողը վկայեց, որ ահաբեկչութենէն աւելի ուժեղ է ան: «Զոյգ բանակներու նահատակներուն յիշատակը մեր գալիք սերունդներուն լուսաւոր փարոսը պիտի դառնայ», եզրափակեց Ասատ:

Share.

Leave A Reply

This site uses Akismet to reduce spam. Learn how your comment data is processed.