ՆԱԽԱԳԱՀ ՍԱՐԳՍԵԱՆ. «ՀԱՅԱՍՏԱՆ ՄԻՇՏ ԿԱՐԵՒՈՐ ՆԿԱՏԱԾ Է ՌՈՒՄԱՆԻՈՅ ՀԵՏ ՅԱՐԱԲԵՐՈՒԹԻՒՆՆԵՐՈՒ ԽՈՐԱՑՈՒՄԸ»

0

Նախագահ Սերժ Սարգսեան երէկ ընդունած է Հայաստանի մէջ դիւանագիտական առաքելութիւնը աւարտած Ռումանիոյ դեսպան Սորին Վասիլէն:

Ըստ նախագահի պաշտօնական կայքին, նախագահ Սերժ Սարգսեան  շնորհակալութիւն յայտնած է դեսպանին` պաշտօնավարման ընթացքին  հայ-ռումանական յարաբերութիւններու ամրապնդման ուղղութեամբ ներդրած ջանքերուն համար եւ յաջողութիւններ մաղթած հետագայ  գործունէութեան մէջ:

Հանրապետութեան նախագահը ընդգծած է, որ Հայաստան միշտ կարեւոր նկատած է Ռումանիոյ հետ համագործակցութեան եւ յարաբերութիւններու  խորացումը` հիմնուած երկու ժողովուրդներուն միջեւ դարաւոր բարեկամութեան վրայ:

Նախագահ Սերժ Սարգսեան արձանագրած է, որ վերջին տարիներուն Հայաստանի եւ Ռումանիոյ միջեւ նկատելիօրէն բարձրացած է քաղաքական հարցերու շուրջ փոխըմբռնումի մակարդակը, ինչ որ կարեւոր է յարաբերութիւններու հետագայ խորացման եւ ամրապնդման տեսանկիւնէն:

Հանրապետութեան նախագահը շնորհակալութիւն յայտնած է ռումանացի ժողովուրդին եւ երկրի իշխանութիւններուն` ռումանահայ համայնքին, ինչպէս նաեւ Ռումանիոյ մէջ հայկական պատմամշակութային ժառանգութեան նկատմամբ ցուցաբերուող հոգատար վերաբերմունքին համար:

Դեսպանը իրեն համար մեծ պատիւ նկատած է Հայաստանի մէջ  պաշտօնավարելը` յայտնելով, որ այդ ընթացքին ձեռք բերած է բազմաթիւ  ընկերներ, աւելի մեծ փորձառութիւն եւ գիտելիքներ հազարամեակներու  պատմութիւն ունեցող Հայաստանի ու հայ ժողովուրդին մասին:

Ռումանիոյ դեսպանը վստահեցուցած է, որ Հայաստանէն կը հեռանայ  շատ լաւ տպաւորութիւններով եւ պիտի շարունակէ մնալ հայ ժողովուրդին ու Հայաստանի բարեկամը:

Share.

Leave A Reply