ԱՒՍՏՐԱԼԻՈՅ ԿԱՆԱՉՆԵՐՈՒ ԿՈՒՍԱԿՑՈՒԹԻՒՆԸ ՃԱՆՉՑԱՒ ԱՐՑԱԽԻ ՀԱՆՐԱՊԵՏՈՒԹԻՒՆԸ

0

Աւստրալիոյ Հայ Դատի Յանձնախումբը կը հաղորդէ, որ Աւստրալիոյ Կանաչներու Կուսակցութիւնը ճանչցած է Արցախի Հանրապետութիւնն ու անոր բնակիչներու ինքնորոշման իրաւունքը:

Յանձնախումբը կը մանրամասնէ, որ կարեւոր ճանաչման նախորդած էին կուսակցութեան բարձրաստիճան անդամ Ճասթըն Էլիքի եւ Հայ Դատի Յանձնախումբի ներկայացուցիչներուն միջեւ հանդիպումները:

Կը նշուի, թէ Աւստրալիոյ Կանաչներու կուսակցութիւնը, որ ճանչցած է նաեւ Հայոց Ցեղասպանութիւնը, դարձած է աշխարհի վրայ Արցախի անկախութիւնը ճանչցած առաջին ոչ հայկական քաղաքական կուսակցութիւններէն մէկը:

Յատկանշական է, որ կուսակցութիւնը նաեւ կոչ ուղղած է Աւստրալիոյ կառավարութեան բոլոր ճիւղերուն պաշտօնապէս ճանչնալու Արցախի Հանրապետութեան անկախութիւնն ու ամրապնդելու Լեռնային Ղարաբաղի Հանրապետութեան ու անոր բնակիչներուն հետ Աւստրալիոյ յարաբերութիւնները:

Այս առիթով Աւստրալիոյ Հայ Դատի Յանձնախումբի տնօրէն Վաչէ Ղահրամանեան իր երախտագիտութիւնը յայտնած է Կանաչներու կուսակցութեան եւ մասնաւորաբար Ճասթըն Էլիքին` Արցախի անկախութիւնն ու անոր ժողովուրդի ինքնորոշման իրաւունքը ճանչնալուն համար:

Աւստրալիոյ մէջ Արցախի Հանրապետութեան մնայուն ներկայացուցիչ Քայլար Միքայէլեան յայտնած է, որ ասիկա պատմական ճանաչում է:

«Արցախի Հանրապետութեան կառավարութեան եւ արցախցիներու անունով շնորհակալութիւն կը յայտնենք Կանաչներու կուսակցութեան` մարդու իրաւունքները յարգելուն համար», ըսած է Միքայէլեան:

Յիշենք, որ Աւստրալիոյ դաշնակցային խորհրդարանին մէջ «կանաչները» ունին 9 ծերակուտական եւ Ներկայացուցիչներու տան մէկ անդամ:

Share.

Leave A Reply