ՀՀ ԿՐԹՈՒԹԵԱՆ ԵՒ ԳԻՏՈՒԹԵԱՆ ՆԱԽԱՐԱՐԸ ԸՆԴՈՒՆԱԾ Է ՀԱՅԿԱԶԵԱՆ ՀԱՄԱԼՍԱՐԱՆԻ ՆԱԽԱԳԱՀԸ

0

Ուրբաթ, 15 Դեկտեմբերին, ՀՀ կրթութեան և գիտութեան նախարար Լևոն Մկրտչեան ընդունած է Պէյրութի Հայկազեան համալսարանի նախագահ Փօլ Հայտոսթեանը և իրեն ուղեկցող Պէյրութի հայկական սփիւռքի ուսումնասիրութեան կեդրոնի տնօրէն Անդրանիկ Տագէսեանը:

Ողջունելով հիւրերը, Լևոն Մկրտչեան ընդգծած է, որ Պէյրութի Հայկազեան համալսարանը հայկական սփիւռքի այն բացառիկ կրթական կեդրոններէն է, որ ոչ միայն ծանրակշիռ ներդրում ունիհայագիտութեան պահպանման գործին մէջ, այլ մշտապէս առանձնացած է որակեալ համալսարանական կրթութեան ապահովումով:

Նախարար Մկրտչեան ընդգծած է, որ համալսարանը լուրջ դերակատարութիւն ունի Լիբանանի բարձրագոյն կրթութեան համակարգին: Ան կարեւոր համարած է Հայկազեան համալսարանին և Հայաստանի կրթական ու գիտական հաստատութիւններուն միջև արդէն իսկ գոյութիւն ունեցող փոխգործակցութեան ամրապնդումին ու հետագայ զարգացումին ուղղուած գործնական քայլերու որդեգրումը: Այս իմաստով, զրուցակիցները անդրադարձած են Հայաստանի մէջ նախատեսուող հայագիտական դպրոցի հիմնադրման աշխատանքներուն մէջ սփիւռքի ներգրաւումին:

Լևոն Մկրտչեան ներկայացուցած է նաև կրթութեան համակարգին մէջ տեղի ունեցող բարեփոխումներուն ընթացքը՝ մասնաւորապէս շեշտելով հանրային քննարկման դրուած «Բարձրագոյն կրթութեան մասին» ՀՀ օրէնքի նախագիծով առաջարկուող արմատական փոփոխութիւնները:

Հայկազեան համալսարանի նախագահը շնորհակալութիւն յայտնելով ջերմ ընդունելութեան համար, իր կարգին կարևոր համարած է հայաստանեան կրթական և գիտական հաստատութիւններու եւ Հայկազեան համալսարանի միջև համագործակցութեան հետագայ զարգացումին ուղղուած քայլերը: Փօլ Հայտոսթեան յայտնած է, որ սփիւռքի մէջ կը հետևին Հայաստանի կրթական համակարգին մէջ տեղի ունեցող բարեփոխումներուն և պատրաստակամ են իրենց փորձն ու գիտելիքները ի նպաստ դնել ոչ միայն հայագիտական կրթական կեդրոնի հիմնադրումին, այլ առհասարակ բարձրագոյն կրթութեան բարեփոխումներուն:

Հանդիպումին ընթացքին անդրադարձ կատարուած է նաև կրթութեան ոլորտէն ներս Հայաստան-սփիւռք կապերու հետագայ ամրապնդումին եւ սփիւռքահայութեան ներուժի իրացումին ուղղուած այլ հարցերու:

ՀՀ ԿԳՆ

Share.

Leave A Reply

This site uses Akismet to reduce spam. Learn how your comment data is processed.