Կախարդուած Նոր Տարին

0

Կիրակի, 17 Դեկտեմբեր 2017-ի երեկոյեան ժամը 6:00-ին, «Ռատիօ Երազի» կազմակերպութեամբ եւ Արաբական Ծանուցողական ընկերութեան համագործակցութեամբ տեղի ունեցաւ մանկական երգերու մեկնաբան Սոնայի «Կախարդուած Նոր Տարին» խորագրով ամանորեան առաջին ելոյթը։ Ելոյթին ներկայ էին՝ Հալէպի լրատուական գրասենեակի տնօրէնը, տեղական եւ օտար լրատուամիջոցներու ներկայացուցիչներ, արաբ եւ ռուս երեւելի անձնաւորութիւններ եւ հալէպահայ փոքրիկներու հոծ բազմութիւն մը: Հրաւիրուած էին նաեւ Սուրիոյ մէջ Քաղցկեղէ Տառապողներու Խնամատար Միութեան սաները։

Հանդիսութեան հայերէն բացման խօսքը արտասանեց Սեւան Ուրիշիկեան, որ ըսաւ.««Ռատիօ Երազ»ին համար կարեւոր է ունկնդիրներուն ու մանաւանդ մանուկներուն ներկայացնել երգեր, որոնք կը նպաստեն անոնց մտքի ու հոգիի աճումին, նաեւ գեղարուեստական ճաշակի ձեւաւորման»։

Ապա բեմ բարձրացաւ սուրիական պատկերասփիւռի հանրածանօթ հաղորդավար Շատի Հլուէ։ Ան ողջունեց ներկաները ու իր խօսքին մէջ շեշտեց, թէ Սուրիոյ, յատկապէս Հալէպի մէջ, հայութեան գոյութիւնը կարեւոր է, որովհետեւ հայութիւնը անբաժան մասնիկն է սուրիական ընկերութեան եւ իր մշակոյթով ու գործուն ներկայութեամբ շինիչ դեր ունի այս երկրէն ներս։ Ան դիտել տալով, որ այս ելոյթը կը զուգադիպի Հալէպի անկախացման առաջին ամեակին, լուսարձակի տակ առաւ Հալէպ քաղաքին ու անոր բնակչութեան ներդրումը Սուրիական Հայրենիքին:

Կախարդուած Նոր Տարուան հեքիաթի հեղինակ Մարգրիտ Շամիլեան ռուսերէնով բացման խօսք արտասանեց՝ ռուս հրաւիրեալներուն ներկայացնելով մանուկներուն նուիրուած այս ելոյթին նպատակը:

Շամիլեան բարի գալուստ մաղթելով ներկաներուն շնորհակալութիւն յայտնեց Ռուսիոյ ղեկավարութեան, որ պատերազմական դժուարին պայմաններուն մէջ ոչ մէկ ճիգ խնայեց սատար հանդիսանալու Սուրիոյ ժողովուրդին։

Այնուհետեւ փոքրիկ հանդիսատեսները հմայուած դիտեցին ներկայացումը։

Բեմահարթակը գոյնզգոյն էր, հեքիաթային մթնոլորտ մը ստեղծուած էր։ Ներկայացման հերոսներն էին՝ հայկական գամփռը, Վանայ փիսիկը, հեքիաթասէրը, երգասէրը, մեծ մայրիկը, Ռուտոլֆ եղնիկը, բարի պարիկը, Ձիւնանուշիկը եւ Կաղանդ Պապուկը։

Հեքիաթասաց մեծ մայրիկը հեքիաթներու շարք մը պատմեց իր թոռնիկներուն՝ հեքիաթասէրին եւ երգասէրին, հեքիաթներէն մէկուն մէջ Կաղանդ Պապուկը կախարդուած էր եւ իւրաքանչիւր երգ մը երգուելուն կախարդանքի մէկ օղակը կը քակուէր: Վերջաւորութեան բոլոր օղակները քակուեցան. կախարդանքը վերացաւ, փոքրիկներուն իղձը իրականացաւ եւ ազատ ու անկախ Կաղանդ Պապուկը երգեց ու պարեց անոնց հետ:

Յուսանք, որ Նոր Տարին ալ կախարդուած ըլլայ, կատարուին մեր բոլոր իղձերն ու երազանքները եւ փոքրիկները, այնպէս ինչպէս  հեքիաթային աշխարհին մէջ, անհոգ եւ ուրախ մանկութիւն մը ապրին։

Ներկայացումը կրկնուեցաւ Չորեքշաբթի, 20 Դեկտեմբեր 2017-ին:

Աւելցնենք, որ ելոյթի նախօրէին, Հալէպի կեդրոնական հրապարակներուն վրայ առաջին անգամ ըլլալով տեղադրուեցան ձեռնարկի հայատառ ծանուցումները ներկայացնող լուսաւոր ցուցափեղկեր։

Ցոլեր Ապաճեան

Share.

Leave A Reply

This site uses Akismet to reduce spam. Learn how your comment data is processed.