ԻՐԱՆԻ ՀԱՅ ՀԱՄԱՅՆՔԸ ՔԱՂԱՔԱԿԱՆ ԻՐԱՎԻՃԱԿԻ ԿԱՅՈՒՆԱՑՄԱՆ ԿՈՂՄՆԱԿԻՑ Է

0

«Ազատութիւն» կը հաղորդէ, որ լրագրող Յովհաննէս Մովսիսեան զրոյց ունեցած է Թեհրան հրատարակուող «Ալիք» օրաթերթի գլխաւոր խմբագիր Դերենիկ Մելիքեանի հետ:

Մելիքեանի խօսքով՝ Իրանի հայ համայնքը պետականութեան պահպանման եւ քաղաքական իրավիճակի կայունացման կողմնակից է, սակայն, երբ ժողովուրդին պահանջը արդա՛ր է, ապա համայնքը կը միանայ այդ պահանջին:

Իրանի տարածքին, վերջին երկու օրերուն, հակաիշխանական ցոյցեր տեղի չե՛ն ունեցած, յայտնած է Մելիքեան՝ աւելցնելով, որ իրավիճակը այժմ համեմատաբար աւելի հանգիստ է:

«Որպէսզի վերահսկելիութիւնն իր լիարժէք մակարդակին հասնի, փողոցներուն մէջ կան իրաւապահ ոյժեր-մարմիններ, բայց, ինչպէս կ’ըսեն՝ կեանքն իր բնական հունով կ’ընթանայ: Տեղ-տեղ կային փոքր դէպքեր, բայց երէկ եւ նախորդ օրը արդէն, կարելի է ըսել, նման ցոյցեր բնաւ տեղի չեն ունեցած», ըսած է Մելիքեան:

«Ալիք»ի խմբագիրը պատմած է, որ նախ սկսան բողոքելու դրամատնային համակարգէն, ապա արծարծուեցան ընկերային-տնտեսական բնոյթի այլ խնդիրներ, սկսան հնչելու նաեւ քաղաքական փոփոխութիւններու կոչեր, որոնցմէ ետք բախումներ ալ եղան ոստիկաններու եւ ցուցարարներու միջեւ:

«Ուշագրաւ է, որ ցոյցերու սկզբնական օրերէն մինչեւ այսօր օրէնսդիր եւ գործադիր մարմիններն իրենք ալ կը խոստովանին եւ կը փաստեն, որ կան անարդար իրավիճակներ՝ կապուած տնտեսական-ընկերային հարցերու հետ, որոնց իրենք հետամուտ են անպայմանօրէն հանգուցալուծելու», «Ազատութեան» փոխանցած է «Ալիք» օրաթերթի խմբագիրը:

Ան նաեւ նկատել տուած է, թէ մարդիկ, ըստ էութեան, կը պահանջէին, որ նախագահ Հասան Ռոհանին իրականացնէ այն բարեփոխումները, զորս խոստացած էր նախագահական ընտրութիւններու քարոզարշաւի ժամանակ: Ինչ կը վերաբերի հայկական համայնքին, Մելիքեանի խօսքով, հայերը որոշած են նման իրավիճակներու պարագային չէզոքութիւն պահպանել՝ կանգնելով պետականութեան պահպանման եւ քաղաքական իրավիճակի կայունացման կողքին, սակայն միաժամանակ՝ միանալ ժողովուրդի արդա՛ր պահանջին:

Share.

Leave A Reply