ՄՈՎՍԷՍ ՅԱԿՈԲԵԱՆ. «ՀԱՅԿԱԿԱՆ ԲԱՆԱԿԻ 65 ՏՈԿՈՍԸ ԿԸ ԿԱԶՄԵՆ ՊԱՅՄԱՆԱԳՐԱՅԻՆ ԶԻՆՈՒՈՐՆԵՐԸ»

0

Հայաստանի Հանրապետութեան զինուած ուժերու գլխաւոր շտապի պետ Մովսէս Յակոբեան կեդրոնական զինուորական հաւաքակայանին մէջ լրագրողներու հետ զրոյցի ընթացքին յայտնած է, որ հայկական բանակի 65 տոկոսը կը կազմեն պայմանագրային զինուորները, եւ միայն 35 տոկոսը պարտադիր ժամկէտային ծառայութիւն իրականացնելու համար զօրակոչուած զինուորներն են:

Ան վստահեցուցած է, որ հայկական բանակի համալրուածութեան մակարդակը բաւական բարձր է. ինչպէս մարտական հերթապահութիւն կրող ստորաբաժանումներու մէջ, այնպէս ալ պահեստային զօրամասերու մէջ, որոնք կը կոչուին մշտական պատրաստութեան զօրամասեր, համալրուածութեան տոկոսը բաւական բարձր է: «Մենք 12 տարի անընդհատ ունինք զօրակոչի նուազում: Ասիկա վերջին տարին է, որ մենք նման նուազում պիտի ունենանք: Եւ ատոր համար զուգահեռաբար բանակը կը համալրենք պայմանագրային զինծառայողներով: Ասիկա որեւէ մէկ ատեն չէ անդրադարձած բանակի մարտունակութեան վրայ: Մենք ծրագիրը  այնպէս կը կատարենք, որպէսզի բանակի մարտունակութեան վրայ զօրակոչի նուազումը չանդրադառնայ», ըստ «Արմէնփրէս»-ի՝ յայտնած է ՀՀ ԶՈՒ գլխաւոր շտապի պետը:

Անդրադառնալով Պաշտպանութեան Նախարարութեան «Ես եմ» ծրագիրին՝ Մովսէս Յակոբեան յայտնած է՝ առ այժմ այս ծրագիրով զինուորական ծառայութեան անցնելու համար դիմած է 120 հոգի:

Այս ծրագիրով զինուորական ծառայութիւն անցնող բոլոր զինուորները պիտի ծառայեն նոյն զօրամասին, նոյն ստորաբաժանման կազմին մէջ. ծառայութեան վայրը պաշտպանութեան Նախարարութիւնը յառաջիկային պիտի ներկայացնէ:

«Անոնք վիճակահանութեան պիտի չմասնակցին, պիտի ծառայեն նոյն զօրամասին մէջ, որովհետեւ անոնց ծառայութիւնը պիտի տարբերի միւս զինուորներու ծառայութենէն: Այս պահուն ծառայութեան վայրի մասին ոչինչ կրնամ ըսել, մենք ատիկա յառաջիկային պիտի յայտարարենք, սակայն կրնամ ըսել, որ ան պիտի ըլլայ սահմանապահ զօրամաս»,  ըսած է Յակոբեան:

8 Յունուարին Հայաստանի մէջ մեկնարկած է ձմեռնային զօրակոչը:

Share.

Leave A Reply

This site uses Akismet to reduce spam. Learn how your comment data is processed.