ՎԱՐՉԱՊԵՏ ԽԱՄԻՍ. «ԱՒԵԼԻ ՔԱՆ 2 ՄԻԼԻԱՌ Ս.Ո. ՊԻՏԻ ՅԱՏԿԱՑՈՒԻ ՀԱԼԷՊԻ ՇԷՅԽ ՆԱՃՃԱՐ ԱՐԴԻՒՆԱԲԵՐԱԿԱՆ ՇՐՋԱՆԻ ՎԵՐԱՇԽՈՒԺԱՑՄԱՆ»

0

Հալէպի արտադրական եւ արդիւնաբերական հաստատութիւններուն աշխատանքը բարելաւելու միտումով, Սուրիոյ վարչապետ Իմատ Խամիս եւ անոր ընկերակցող պատուիրակութիւնը, Երկուշաբթի, 8 Յունուարին մէկէ աւելի այցելութիւններ տուին Հալէպի Արքուպ եւ Շէյխ Նաճճար արդիւնաբերական շրջաններ, ծանօթացան գործարաններուն կրած վնասներուն, անոնց աշխատանքի բնոյթին ու տարողութեան եւ գործարանատէրերուն հետ քննարկեցին արդիւնաբերական այս շրջաններու սրընթաց զարգացման կարելիութիւններն ու դժուարութիւնները: Անոնք թափանցիկ զրոյցի մը ընթացքին տեղեկացան նաեւ, թէ գործարանատէրերը ի՞նչ պահանջներ ունին իրենց բնականոն աշխատանքին վերսկսելու եւ Հալէպի արդիւնաբերութեան անիւը յառաջ մղելու համար:

Վարչապետը յայտնեց, թէ Հալէպի ՇԷյխ Նաճճար արդիւնաբերական շրջանի վերաշխուժացման պիտի յատկացուի աւելի քան 2 միլիառ սուրիական ոսկի, գիւղատնտեսութեան՝ 11 միլիառ, ծառայողական ոլորտին՝ 60 միլիառ: Ան դիտել տուաւ, որ Հալէպի արդիւնաբերողներուն եւ վաճառականներուն յատուկ դիւրութիւններ պիտի ընծայուին: Դրամական վարկեր, ինչպէս նաեւ երեք տարուան համար մասնավճարներով ելեկտրածին գործիքներ պիտի յատկացուին Հալէպի արդիւնաբերական եօթը շրջաններու գործարանատէրերուն, արտածումի, ներածումի, ներքին եւ արտաքին ցուցահանդէսներու ծրագիրները պիտի բազմանան, վառելանիւթը մշտական ձեւով եւ նպաստաւոր սակագիներով պիտի ապահովուի, ինչպէս նաեւ տեղական արտադրութիւններու խրախուսման համար զանազան կարելիութիւններ պիտի ստեղծուին, որոնց կողքին սուրիական լիրան աստիճանաբար կայուն արժէք պիտի ունենայ օտար դրամանիշերուն դիմաց: Վարչապետը եզրափակելով ըսաւ, որ Հալէպ տնտեսական զարթօնք պիտի ապրի, որուն համար պետութիւնը ամէն ջանք ի գործ պիտի դնէ:

Նոյն օրը վարչապետ Խամիս այլ ժողով մը գումարեց Հալէպի եւ անոր արուարձաններուն ծառայողական եւ բնակարանային ոլորտներու պատասխանատուներուն հետ, զրուցեց Հալէպ նահանգի ծառայողական բազմաբնոյթ աշխատանքներու բարելաւման, տնտեսական եւ ներդրումային ծրագիրներու աշխուժացման շուրջ՝ դիտել տալով, որ պետական բոլոր կողմերը կազմակերպ ու արդիւնաբեր աշխատանքով պէտք է ձեռնարկեն Հալէպ նահանգի բարգաւաճման, որպէսզի Հալէպ վերստին դառնայ Սուրիոյ տնտեսութեան մայրաքաղաքը:

Share.

Leave A Reply

This site uses Akismet to reduce spam. Learn how your comment data is processed.