ՆԱԹԱԼԻՆԻ ԱՅՑԵԼԵՑ ԾԻԾԵՌՆԱԿԱԲԵՐԴ. «ՅՈՒԶՈՒԱԾ ԵՄ ՁԵՐ ՈՒԺԷՆ»

0

Հայաստան կը գտնուի Պրազիլի Կանաչներու Կուսակցութիւնը ներկայացնող, Երեւանի քոյր-քաղաք Սան Փաուլոյի աւագանիի անդամ Ճիլպերթօ Թոնոս Նաթալինի: Անոր կ՛ընկերակցի Պրազիլի Հայ Դատի յանձնախումբի նախագահ Գէորգ Զատիկեան:

Տեղեկացնենք, որ Նաթալինի աշխոյժ գործունէութիւն կը ծաւալէ Հայ Դատի աշխատանքներուն ուղղութեամբ: Ան կը պաշտպանէ նաեւ Արցախի ինքնորոշման իրաւունքը:

Նաթալինի 7 Յունուարէն Հայաստան կը գտնուի ՀՅԴ-ի հրաւէրով: Ան այս տարի պիտի մասնակցի Պրազիլի  խորհրդարանական ընտրութիւններուն:

Նաթալինի հանդիպում ունեցած է Երեւանի քաղաքապետ Տարօն Մարգարեանի հետ: «Երկիր»ի հետ զրոյցի մը ընթացքին ան յայտնեց, թէ քանի որ Երեւանն ու Սան Փաուլօն քոյր-քաղաքներ են, շարք մը  համաձայնութիւններ ձեռք բերուած են Երեւանի քաղաքապետ Տարօն Մարգարեանի հետ: «Քաղաքապետին հետ խօսուած է երկու քաղաքներու փոխադարձ աշխատանքներուն մասին: Նոյնիսկ  պայմանաւորուածութիւն ձեռք բերուած է, որ Սան Փաուլոյի քաղաքապետը այցելէ Երեւան` քաղաքի 2800-ամեակին մասնակցելու», ըսաւ Նաթալինի:

Ան յայտնեց, որ քաղաքապետին հետ հանդիպումին ընթացքին թէեւ խօսուած է տարբեր նիւթերու մասին, բայց ամէնէն կարեւորը այն է, որ աւելի մօտեցնեն Սան Փաուլօն Երեւանի, ինչու ոչ` նաեւ Արցախի հետ, ընդ որում` ո՛չ միայն մշակութային իմաստով, այլ նաեւ` քաղաքական:

Երէկ Նաթալինի այցելած է Հայոց Ցեղասպանութեան յուշահամալիր եւ յարգանքի տուրք մատուցած անմեղ զոհերու յիշատակին, այցելած է  նաեւ Ցեղասպանութեան թանգարան: «Շատ յուզուած եմ: Ես ծանօթ եմ ձեր պատմութեան եւ հիմա շատ յուզուած եմ, որ կրցայ անմեղ զոհերու  յիշատակի դամբարանին մօտ ծաղիկներ դնել», ըսաւ ան:

Ըստ Նաթալինիի, իրեն ամէնէն շատը յուզած է այն, որ հայերը շատ կարեւորութիւն կու տան իրենց արմատներուն, անցեալին եւ ներկային: «Դուք կարեւորութիւն կու տաք անցեալին` պաշտպանելով երկու կողմերը` արդիականը եւ արմատները: Այդ ձեւով կրնաք պատմութիւն  պաշտպանել, եւ ես յուզուած եմ ձեր այդ ոյժէն», շեշտեց ան:

Նաթալինի նշեց, որ այն, ինչ որ տեսած է Սան Փաուլոյի հայ գաղութին մէջ, կրնայ փաստել, որ այստեղ ալ հայերը նոյն մաքուր ազգն են: «Նոյն մաքուր, աշխատասէր ազգն էք. ինչ որ կը կարծէի, որ էք, այստեղ կրցայ  աւելի պարզօրէն նկատել եւ հաստատել», ըսաւ ան:

Նաթալինի նաեւ տեղեկացուց, որ 5-էն 7 Յունուարին եռօրեայ այցելութեամբ եղած է Արցախ: «Շատ տպաւորուած եմ Արցախով: Այնտեղ հայերուն հետ միասին նշեցի Ս. Ծնունդը, եղայ Շուշի եւ  Գանձասար: Ուրախ եւ ոգեւորուած եմ Արցախ այցելելէ ետք», ըսաւ ան:

Share.

Leave A Reply

This site uses Akismet to reduce spam. Learn how your comment data is processed.