ՄՈՒՐԱՏ ՓԱՓԱԶԵԱՆ. «ԲՆԱԿԱՆ ՉԷՐ, ՈՐ ՄԱՔՐՈՆ – ԷՐՏՈՂԱՆ ՀԱՆԴԻՊՈՒՄԻՆ ՉՔՆՆԱՐԿՈՒԵՑԱՒ ՀԱՅՈՑ ՑԵՂԱՍՊԱՆՈՒԹԵԱՆ ՀԱՐՑԸ, ՄԵՆՔ ԿԸ ԴԱՏԱՊԱՐՏԵՆՔ ԱՏԻԿԱ»

0

Ֆրանսայի Հայկական ընկերութիւնները համակարգող խորհուրդը Թուրքիոյ նախագահ Ռեճէպ Թայիպ Էրտողանի հետ հանդիպումէն առաջ եւ յետոյ Ֆրանսայի նախագահ Էմանուէլ Մաքրոնին ուղղուած յայտարարութիւններով հանդէս եկած էր: «Թերթ»ի հետ զրոյցի մը ընթացքին Ֆրանսայի Հայկական ընկերութիւնները համակարգող խորհուրդի նախագահ Մուրատ Փափազեան յայտնեց, որ իրենց յայտարարութեան մէջ յայտնած էին, թէ դէմ չեն, որ Ֆրանսայի եւ Թուրքիոյ միջեւ հանդիպումներ ըլլան, բայց երբ Ֆրանսայի պէս երկիր մը կ՛ընդունի Թուրքիոյ` այդ ալ Էրտողանի պէս նախագահ մը, Ֆրանսան պէտք է իր խօսքը յստակօրէն ըսէ:

«Ֆրանսան ու Թուրքիան դաշնակից երկիրներ են, կան քանի մը հարցեր` անվտանգութեան, ահաբեկչութեան դէմ պայքարի եւ այլն, եւ բնական է, որ Ֆրանսան այս ուղղութիւններով համագործակցի Թուրքիոյ հետ: Ասիկա յստակ է, եւ հակառակը ոեւէ մէկը չի կրնար ըսել: Ֆրանսայի նախագահը Էրտողանի հետ հանդիպումին բարձրաձայնեց մաքսային իրաւական հարցերու, բանտարկուած լրագրողներու, Թուրքիոյ` Եւրոպական Միութեան անդամ դառնալու անկարելիութեան հարցերը: Բայց ան չանդրադարձաւ Հայոց Ցեղասպանութեան, Կիպրոսի եւ քիւրտերու հարցերուն: Մենք դատապարտեցինք եւ կը դատապարտենք ատիկա, որովհետեւ ատիկա բնական չէր: Իր պարտականութիւնն էր ատիկա, որովհետեւ Ֆրանսան, որպէս ժողովրդավարական երկիր, որպէս օրինակ, Եւրոպայի մէջ առաջնորդ պետութիւն` պէտք է միշտ իր խօսքը ըսէ այդպիսի երկիրներու ղեկավարներուն», ըսաւ ան:

Մուրատ Փափազեան համաձայն գտնուեցաւ, որ Ֆրանսայի նախագահ Էմանուէլ Մաքրոնի համար կարեւոր են այլ երկիրներու հետ տնտեսական յարաբերութիւնները: Ան մատնանշեց, որ Թուրքիան եւ Ատրպէյճանը կարեւոր շուկայ են Ֆրանսայի համար: «Մենք նաեւ մեր` Մաքրոնին ուղղուած յայտարարութեան մէջ դատապարտեցինք, որ պէտք չէր հանդիպումի առաջին իսկ պահին ստորագրէին ռազմական համագործակցութեան պայմանագիրներ: Մենք վտանգուած ենք, որովհետեւ Թուրքիան եւ Ատրպէյճանը թշնամական քաղաքականութիւն կը վարեն: Օլանտի նախագահութեան օրերուն նման խնդիրներ չկային: Մենք աշխատանք տարած ենք Հայոց Ցեղասպանութեան ճանաչման, Հայ Դատի, Արցախի ճանաչման հարցերու ուղղութեամբ: Հիմա ալ մենք պէտք է աշխատինք, դժուար ըլլալու է, բայց պէտք է աշխատինք», ըսաւ ան:

Ըստ ֆրանսահայ գործիչին, դժուար ըլլալու է ներկայիս նախագահ Ֆրանսուա Մաքրոնի հետ աշխատիլը, բայց պէտք է, որ Հայաստանն ալ Ֆրանսայի համար կարեւոր երկիր ըլլայ: «Հայաստանը փոքր երկիր է, բայց կրնայ հանգրուան ըլլալ այլ երկիրներու ընկերութիւններու համար», ըսաւ ան:

Մուրատ Փափազեան, որպէս Ֆրանսան հետաքրքրող բան, մատնանշեց Հայաստանի մէջ այս տարի սպասուող իրադարձութիւնները: «Այս տարի առաջին հանրապետութեան 100-ամեակն  է: Այստեղ ներկայ պիտի ըլլայ Ֆրանսայի արտաքին գործոց նախարարը: Պատմական նախաձեռնութիւն է, եւ պէտք է, որ յաջողինք», ըսաւ ան:

Երկրորդ, Ֆրանսան հետաքրքրող ձեռնարկը, ըստ Մուրատ Փափազեանի, Հոկտեմբերին Հայաստանի մէջ Ֆրանսախօսութեան նուիրուած ձեռնարկներն են, որոնց պիտի մասնակցի անձամբ Ֆրանսայի նախագահ Էմանուէլ Մաքրոնը:

«Այս տարի նախաձեռնութիւններ պէտք է ըլլան, որպէսզի Հայաստանը արժեւորուի: Ատիկա շատ կարեւոր եւ պատմական պիտի ըլլայ, եթէ յաջողութիւն արձանագրենք: Բայց կրկին հարց կայ, եւ բոլորս պէտք է գիտակցինք, թէ Թուրքիա եւ Ատրպէյճան կը տեսնեն, որ հայկական սփիւռքը յաջողած է Ֆրանսայի մէջ ունենալ ամենաբարձր մակարդակներու վրայ իր կապերը, եւ գուցէ ատոր դէմ քայլեր ձեռնարկեն: Չկայ ուրիշ երկիր մը, որուն նախագահը կու գայ մասնակցելու հայութեան կազմակերպած ձեռնարկին: Մենք մեր ոյժերը պէտք է ուղղենք, միացնենք, աշխատինք այդ ուղղութեամբ: Յստակ է, որ մեզի համար դժուար պիտի ըլլայ հիմա, քանի որ Մաքրոնին խնդիրը երկիրը տնտեսապէս բարելաւելն է», ըսաւ ան:

Ֆրանսայի նախագահը, ըստ Մուրատ Փափազեանին, ստացած է Հայկական Ընկերութիւնները Համակարգող Խորհուրդի յայտարարութիւնը, բացի այդ` անոնք կը պատրաստուին իրենց դիտարկումները ներկայացնել խորհուրդի այս տարուան ընթրիքին, որուն հաւանաբար ներկայ  ըլլայ նաեւ Ֆրանսայի նախագահ Մաքրոնը:

Share.

Leave A Reply