ԻՐԱՆԱՀԱՅ ՊԱՏԳԱՄԱՒՈՐ ԿԱՐԷՆ ԽԱՆԼԱՐԵԱՆ. «ԱՊԱԿԱՅՈՒՆԱՑՄԱՆ ՀՐԱՀՐՈՒՄՈՎ ԿԱՐԵԼԻ ՉԷ ԻՐԱՆԻՆ ԲԱՆ ՄԸ ՊԱՐՏԱԴՐԵԼ»

0

Իրանի Խորհրդարանի հայազգի պատգամաւոր Կարէն Խանլարեան «Թերթ»ի հետ զրոյցի մը ընթացքին յայտնեց, որ Իրանի մէջ բարձրացող դժգոհութեան ալիքին հիմքը ընկերային հարցերն ու արտաքին ազդակներն են միաժամանակ: Բողոքի այսպիսի ալիքներ, Իրանի մէջ, նախապէս ալ բարձրացած են: Ան ըսաւ, որ վերջին տարիներուն դժգոհութիւններ կային երկրի կառավարութեան վարած տնտեսական քաղաքականութենէն. սա ակնյայտ էր: Դժգոհութիւնները, սակայն, բազմապատկուեցան Իրանի նկատմամբ պատժամիջոցներու կիրառումին հետեւանքով:

« Իրանի հիւլէական ծրագրին առնչուող վերջին համաձայնութիւններուն լոյսին տակ , ակնկալելի էր պատժամիջոցներու, աստիճանական վերացումը, սակայն այդպէս չեղաւ: Այդ պատժամիջոցները ոչ միայն չվերացան, այլ աւելցան, որպէսզի Իրանին բան մը պարտադրուէր», ըսաւ ան` նկատել տալով, որ իր ըսածը պէտք է դիտարկել տարածաշրջանային քաղաքականութեան մէջ:

Կարէն Խանլարեանի խօսքով` Իրանի հասարակութեան ընկերային դժգոհութիւններուն ալիքին վրայ բարձրացաւ նաեւ  քաղաքական դժգոհութիւնը: Այստեղ իրենց դերը ունին ոչ միայն Միացեալ Նահանգները, այլ վերջինիս` այս տարածաշրջանի դաշնակիցները, յատկապէս` Սէուտական Արաբիան, Իսրայէլը եւ Թուրքիան:

«Թուրքիան աներեւոյթ կը գործէ. իբրեւ թէ խնդիրներ չունի Իրանի հետ, դաշնակից է, սակայն Թուրքիան եւս  անուղղակիօրէն հրահրեց այս ալիքը», ըսաւ ան:

Իրանահայ պատգամաւորին խօսքով, վերջին տարիներուն, տարբեր խաւեր խորհրդարանին դիմաց յաճախակիօրէն բողոքի ցոյցեր կը կազմակերպէին: «Բողոքներ միշտ ալ եղած են, եւ անոնց ընթացքին ինչ-որ լուծումներ տրուած են: Բայց այս անգամ կարծես դուրս եկան իրենց բնական հունէն, ինչ որ, կը կարծեմ, շարք մը քաղաքական շրջանակներու կողմէ կազմակերպուած էր, նպատակն ալ, ինծի համար պարզ է` պարտադրել Իրանին, որ համակերպի տարածաշրջանի քաղաքականութեան», ըսաւ ան:

Պատասխանելով այն հարցումին, թէ ինչպիսի՛ իրավիճակ կը նախատեսէ Իրանի համար այն պարագային, երբ Միացեալ Նահանգները եւ անոր դաշնակիցները կ’օգտուին իրավիճակէն, Կարէն Խանրալեան ըսաւ, որ Միացեալ Նահանգներ արդէն լաւ հասկացած է, որ կարելի չէ Իրանին այդ ոճով պատասխան տալ:

Ըստ Կարէն Խանլարեանի, Իրանի մէջ տեղի ունեցածը Հայաստան-իրան յարաբերութիւններու ն վրայ ազդեցութիւնը չի կրնար ունենալ: «Բայց մէկ բան պէտք չէ մոռանանք․ Իրան  Հայաստանի եւ հայութեան համար ռազմավարական գործընկեր է: Կը կարծեմ, որ հզօրը Իրանն է, որ կրնայ գործընկեր ըլլալ դրացիներուն, այս պարագային՝ Հայաստանի համար: Ապակայունացած վիճակով  Իրան կրնայ նոյնիսկ աղէտաբեր ըլլալ տարածաշրջանին համար. Իրանի ներկայ կարգավիճակն է, որ խաղաղութեան հեռանկար կը պարզէ տարածաշրջանին համար: Եթէ Իրան իր այս ռազմավարական հզօրութիւնը կորսնցնէ, կը կարծեմ, որ այս տարածաշրջանն ալ աւելի կը մխրճուի աղէտալի իրավիճակներու մէջ, որոնք կրնան վնասաբեր ըլլալ բոլորին համար»:

Պատասխանելով այն հարցումին, թէ արդեօ՞ք Հայաստան պէտք է իր յստակ դիրքորոշումը յայտնէ Իրանի մէջ տեղի ունեցածին մասին, որպէս դրացի երկիր, Կարէն Խանլարեան ըսաւ․«Ես, որպէս Իրանի քաղաքացի, միշտ կ’ակնկալեմ Հայաստանէն, որպէս Իրանին առնչակից եւ դրացի երկիր, որ արեւմտեան որոշ երկիրներու տարածած իրանախորշութեան վերջ դնէ․ Հայաստանն ու հայութիւնը Իրանի եւ՛ քաղաքակրթութեան, եւ՛ անցեալին, եւ՛ ներկային քաջածանօթ են, գիտեն, որ Իրան այն դէմքը չունի, ինչ որ արեւմուտքը կը փորձէ ներկայացնել աշխարհին: Շատեր կը փորձեն Իրանը ներկայացնել որպէս ահաբեկչական պետութիւն, բայց մենք գիտենք, որ այդպէս չէ, գիտենք, որ Իրան այս տարածաշրջանի անկայունութեան մէջ եղած է կայունութեան կղզեակ մը, իսկ ատիկա կը բխի Իրանի անցեալէն, քաղաքական փորձէն: Մենք պէտք է, որպէս այս ամէնուն գիտակ, աշխարհին ատիկա ներկայացնենք, այս հարցին մէջ Հայաստանի դիւանագիտութիւնը կրնայ շատ դրական դերակատարութիւն ունենալ: Այդ ամրագրումները հիմա պէտք են, քանի որ տարածաշրջանը կը գտնուի նոր ձեւաւորումներու փուլի մէջ», եզրափակեց ան:

Share.

Leave A Reply

This site uses Akismet to reduce spam. Learn how your comment data is processed.