100-ԱՄԵԱՅ ՀՄԸՄ

0

2018-ը յատկանշական թուական մըն է ՀՄԸՄ-ին համար…

Թուական մը, որ հպարտութեամբ կը լեցնէ մեր սրտերը, նոր աւիւն կու տայ եւ կը խրախուսէ մեզ:

Կանգնած ենք ՀՄԸՄ-ի հիմնադրութեան 100-ամեակի սեմին…

1918-ը հայ ժողովուրդի նորագոյն պատմութեան մէջ կերպարանափոխիչ, հրաշագործ, յաւերժախօս տարի մը հանդիսացաւ, երբ Երեւանէն անկախութեան արեգակը կը բարձրանար, եւ Արամ Մանուկեան բարձրաճակատ կը ճախրէր ազատ անկախ Հայրենիքի երկնակամարին վրայ: Նոր նուաճումի մը աւետիսը կը շեփորահարուէր Պոլիսէն, ուր Յակոբեաններու, Սիրունիներու, Հինդլեաններու ազգօգուտ մտայղացման շնորհիւ կեանքի կը կոչուէր Հայ Մարմնակրթական Ընդհանուր Միութիւնը:

Կեանքի մէջ հպարտութեան ամենավսեմը ազգային հպարտութիւնն է եւ ոչ մէկ բոց չի ջերմացներ մեր հոգիները, այնպէս ինչպէս կը ջերմացնեն ազգային փառքի ճառագայթները:

Մենք լաւ գիտենք քաղաքակրթութեան ճշգրիտ ցուցանիշը, ո՛չ հարստութեան ու կրթութեան մակարդակն է, եւ ոչ ալ քաղաքներու մեծութիւնը, այլ` երկրի մը դաստիարակած մարդուն պատկերն ու անոր ունեցած արժանիքներն են:

Այսօր, ՀՄԸՄ-ի հիմնադրութեան 100 տարիներու հոլովոյթին ընթացքին, երբ քայլ առ քայլ աւելի երիտասարդացած միութեանս ընդմէջէն կը ճեղքենք ժամանակի շերտերը` տեսանելի կը դառնան մեր աւագ սերունդին հասուն, գեղեցիկ ու զօրեղ մտքերը, որոնք լիցքաւորուած են փառքի, պատուի ու գոյատեւումի ձգտումներով, կերտած են լոյսի այս օճախը: Մենք կը գիտակցինք, թէ չկան դափնիներ` առանց տառապանքի եւ չկայ փառք` առանց խոցերու: Բի՜ւր փառք հիմնադիրներու անմար յիշատակին:

Կազմակերպութիւններու եւ միութիւններու կենսունակութիւնը յաճախ պայմանաւորուած է ներշնչումի իրենց աղբիւրներուն քանակով եւ որակով: Կազմակերպութիւն մը որքա՛ն հարուստ է յիշատակութեան արժանի դէմքերով ու դէպքերով, այնքա՛ն կապուած կ՛ըլլայ իր աւանդութիւններուն եւ արժէքներուն:

Այսպէս է ՀՄԸՄ-ը: Ան շատ բան տուած է ու կը շարունակէ տալ հայ երիտասարդին, հարստացնելով անոր հաւաքական, ընկերային եւ մարզական կեանքը:

100 հատորով կարելի չէ տալ այս միութեան ամբողջական պատմութիւնը: Այդ իսկ պատճառով, 2018-ի «Գանձասար»ի այս անկիւնով պիտի փորձենք լուսարձակի տակ առնել տարիներու հարուստ պատմութիւն ունեցող միութեան կեանքն ու գործունէութիւնը, անոր անցած ճանապարհն ու առաքելութիւնը, ձեզի ներկայացնելով նաեւ ՀՄԸՄ-ականներու յօդուածներ, յուշեր, հարցազրոյցներ եւ Սուրիոյ մասնաճիւղերուն առնչուող նիւթեր, որպէսզի մերօրեայ պատանին ու երիտասարդը հաղորդակից դառնան այն մթնոլորտին ու ոգիին, որոնք կը բնորոշեն ՀՄԸՄ-ականը: Այս ոգին է, որ կը սորվեցնէ պատանիին եւ երիտասարդին ՀՄԸՄ-ականի ապրումներով զգալ ու մտածել, ՀՄԸՄ-ական մարդու ջիղերով ապրիլ ու գործել եւ ձեռք-ձեռքի տալով աւելի բարձրանալ ու բարձրացնել ՀՄԸՄ-ի ջահը:

«Պատուաբեր Անցեալէն Յաղթական Ապագայ» կարգախօսով ծառայելու, պայքարելու եւ գոյատեւելու վճռակամութեամբ` օրհնութեամբ լեցուն լուսաւոր ճանապարհ կը մաղթենք ՀՄԸՄ-ի մեծ ընտանիքին:

ՀՄԸՄ-ի Սուրիոյ Շրջ. Վարչութեան Մամուլի Յանձնախումբ

Share.

Leave A Reply