ԽՄԲԱԳՐԱԿԱՆ՝ Յունուար Դ./2018. ՁԻԹԵՆԻԻ ԹՐՔԱԿԱՆ ՃԻՒՂԸ ԽԱՂԱՂՈՒԹԻՒՆ ՉԻ ԽՈՍՏԱՆԱՐ

0

Սուրիական տագնապի սկիզբէն ի վեր Թուրքիա յարձակողական իր նոյն քաղաքականութիւնը կը վարէ: Պատերազմի սկզբնական փուլերուն, սուրիական քաղաքներու ու աւաններու վրայ յարձակումներ հրահրելով, Թուրքիա կը սպառնար երկրի ինքնիշխանութեան, ան չէր վարաներ իր ախորժակները յայտնելու, նոյնիսկ երկրի առաջին դէմքին՝ Էրտողանին Դամասկոս հասնելու եւ Օմայատ մզկիթին մէջ աղօթելու յաւակնութեամբ: Թուրքիոյ յաջորդ դաւը սուրիական հողերուն վրայ 30 ք.մ. երկարութեամբ ապահով գօտիի մը  հաստատման նկրտումն էր, որ կրկին ի դերեւ ելաւ սուրիական բանակին ու անոր դաշնակիցներուն ռազմավարութեան շնորհիւ: Շրջան մը վերջ, «Եփրատի Վահան» ծրագիրով, Թուրքիա քիւրտերու հաւանական ներխուժման դէմ ապահովական շրջան մը յառաջացնելու փորձ կատարեց, որուն կողքին Սուրիոյ հետ սահմանի երկայնքին պատ մըն ալ բարձրացուց: Այս բոլորը, սակայն, բաւարար չեղան Թուրքիոյ ապահովութեան համար:

Սուրիական բանակին սրընթաց յառաջացումը եւ Իտլիպի գիւղերը հասնիլը, Սուրիոյ մէջ թրքական ազդեցութեան վերջին գօտիներու չեզոքացման ահազանգը հնչեցուցին, իսկ ԱՄՆ-ի Սուրիոյ հիւսիսային շրջանին մէջ զինեալ քրտական ջոկատներու մարզումին ձեռնարկումն ու այդ իմաստով կատարած յայտարարութիւնները սուրիական տագնապի թնճուկին մէջ թրքական քաղաքականութեան ամբողջական ձախողութիւնը երեւան բերին:

Այժմ Թուրքիա, խաղաղութեան խորհրդանիշը՝ ձիթենիի ճիւղը ձեռին, մէկ կողմէն քրտական գործօնը այլ երկրի մը՝ այս պարագային Սուրիոյ մէջ տկարացնել կը փորձէ, հաւանաբար ենթադրելով որ դուռը փակելով վտանգէն զերծ պիտի մնայ, առանց հաշուի առնելու քրտական գործօնին երկրէն ներս ունեցած ազդեցութիւնը, առաւելաբար վստահելով իր բիրտ ոյժին: Միւս կողմէն Սուրիոյ մէջ իր գործակալներուն ծաւալումին համար պարարտ հող ստեղծել կը փորձէ, յատկապէս սուրիական բանակին կողմէ Իտլիպի մօտալուտ ազատագրումին հետեւանքը գուշակելով:

Սուրիական բանակը բնականաբար իր առաջնահերթութիւններուն համաձայն կը յառաջանայ: Ան չի ներքաշուիր թրքական լծակներուն մէջ: Այժմ բանակը Իտլիպ նահանգին աւելի քան 300 գիւղերն ու տեղւոյն զինուորական  օդակայանը ազատագրած է արդէն: Սուրիոյ պետութիւնն ու ժողովուրդը քաջ գիտեն, որ թրքական ներխուժումը երկրին ու անոր բազմերանգ ընկերութեան ոչ մէկ նպաստ կը բերեն: Ընդհակառակն՝ ահաբեկչութեան դէմ պայքարի պատրուակով կը սպաննեն Սուրիոյ քաղաքացիները, կը քանդեն բնակարաններ, գիւղեր ու քաղաքներ ու միայն թրքական շահերուն կը ծառայեն:

Սուրիական ընկերութեան բոլոր բաղադրիչներուն, աւելին՝ միասնական ու ամբողջական Սուրիոյ պահպանման համար տագնապի միակ լուծումը բանակցութիւններու սեղանին շուրջ համախմբուիլն է Սոչիի մէջ: Պահուան լրջութիւնը չըմբռնող կողմերը հասկնալու են վերջապէս, որ երկրէն ներս սուրիական բանակն է միակ երաշխիքը արտաքին սպառնալիքներուն դէմ պաշտպանուելու:

Ձիթենիի այս ճիւղը խաղաղութիւն չի խոստանար:

«Գ.»

Share.

Leave A Reply