ԼԱԹԱՔԻՈՅ ԱԶԳ. ՍՐԲՈՑ ՆԱՀԱՏԱԿԱՑ ՎԱՐԺԱՐԱՆԻ ԱՇԱԿԵՐՏՆԵՐԸ ՎԵՐԱՆՈՐՈԳԵՑԻՆ ԻՐԵՆՑ ՈՒԽՏԸ՝ ՔԱԼԵԼՈՒ ՎԱՐԴԱՆՆԵՐՈՒ ԵՒ ՂԵՒՈՆԴՆԵՐՈՒ ՈՒՂԻԷՆ

0
Չորեքշաբթի, 7 Փետրուար 2018-ին, Ազգ. Սրբոց Նահատակաց վարժարանի աշակերտութիւնը համախմբուելով Ս. Աստուածածին եկեղեցւոյ կամարներուն ներքեւ, ոգեկոչեց Սրբոց Վարդանանց և 1036 վկաներու յիշատակը, ներկայութեամբ վարժարանի տնօրէնութեան, հոգաբարձական և ուսուցչական կազմերուն:
 
Յայտագիրին բացման խօսքը արտասանեց հայերէնաւանդ ուսուցչուհի Ռիթա Կաղեան Տիքպիքեան, որ նկատել տուաւ, թէ. « Վարդանանց պատերազմի յիշատակումը կը կատարենք դարերէ ի վեր։ Աւարայրի հերոսները իրենց կեանքը զոհելով ո’չ միայն պահպանեցին հայուն ազգային և կրօնական ինքնութիւնը, այլեւ օրինակ դարձան նուիրումի և զոհողութեան»:
 
Ձեռնարկին բեմավարութիւնը կատարեցին Ե. կարգէն չորս աշակերտներ: Զ. կարգի աշակերտուհիները համառօտ կերպով ներկայացուցին Աւարայրի հերոսամարտին պատմութիւնը:
 
Գեղարուեստական յայտագիրով Ը. կարգի աշակերտուհիները տպաւորիչ առոգանութեամբ ասմունքեցին «Դէպի Աւարայր» քերթուածը, իսկ Ե. կարգի աշակերտները երգեցին «Գողթնի Քնարք» ոգեւորիչ երգը: Է. կարգի աշակերտները «Քաջ Վարդան» բանաստեղծութիւնը ասմունքելով Վարդան Մամիկոնեանի տիպարով ներշնչուեցան, ապա Է. եւ Ը. կարգերու աշակերտները «Իմ Հայրենեաց Հոգի, Վարդան» երգով Աւարայրի հերոսին սխրանքը գովերգեցին:
Գեղարուեստական յայտագիրի աւարտէն ետք, օրուան խորհուրդը ներկայացուց Ռիթա Կաղեան Տիքպիքեան: Ան շեշտեց, որ Սրբոց Վարդանանց տօնը սովորական տօն մը չէ մեզի համար, այլ առիթ մըն է վերանորոգելու մեր ուխտը՝ արժանի ժառանգորդները ըլլալու սպարապետ Վարդան Մամիկոնեանին և իր խիզախ զինուորներուն:
 
Հայերէնաւանդ ուսուցչուհին թելադրեց աշակերտներուն Վարդանանց պատերազմի խորհուրդով տոգորուիլ, մեր ազգային արժէքները պահել ու պահպանել, գուրգուրալ մեր ոսկեղնիկ մայրենի լեզուին, ամուր պահել քրիստոնէական հաւատքը ու սիրել մեր չքնաղ հայրենիքը:
 
Ապա խօսք առաւ վարժարանի տնօրէնուհի Հուրի Տէիրմէնճեան, որ գնահատեց աշակերտներուն անթերի ներկայացումը և թելադրեց միշտ յիշել Վարդանանց խորհուրդն ու նահատակներուն պատգամը:
Share.

Leave A Reply