ԵՈԿԱՅԻ ՕԳՏԱԿԱՐՈՒԹԻՒՆԸ ԱՌՈՂՋՈՒԹԵԱՆ

0

Ուրբաթ, 2 Փետրուարին ՍՕ Խաչի Շրջ. Վարչութեան Դաստիարակչական յանձնախումբը հալէպահայ կիները հրաւիրած էր եոկայի մարզարուեստին ու անոր օգտակարութեան ծանօթանալու մտերմիկ հանդիպումի մը։

Ձեռնարկը տեղի ունեցաւ ԱՄԺ Տան «Լեւոն Շանթ» սրահէն ներս։ Եոկայի արուեստը մեկնաբանելու համար յանձնախումբը հրաւիրած էր հմուտ մասնագէտ տիար Ռազէք Մալօն։

Բացման խօսքով յանձնախումբի անդամ Շողիկ Շահինեան-Կիրակոսեան դիտել տուաւ, թէ մտքի եւ մարմնի առողջ հաղորդակցութիւնը աշխուժացնող արդի մարզարուեստ մըն է եոկան, որ կրնայ օգտակար դառնալ յատկապէս ընկճուածութեան, անձկութեան, գերյոգնածութեան եւ գերճնշուածութեան պարագաներուն։ Եոկան սոսկ մարզանք չէ այլ մարմինի, հոգիի եւ ուղեղի ներդաշնակութիւնը պահող համակարգ մըն է, որ կը յարմարի բոլոր տարիքի մարդոց։ Ան ծնունդ առած է 5000 տարի առաջ։ Այս մարզանքին համար անհրաժեշտ չեն գործիքներ կամ ընդարձակ սրահներ, կրնանք կիրառել զայն որեւէ ժամու եւ որեւէ տեղ։ Այնուհետեւ Կիրակոսեան ծանօթացուց օրուան դասախօս տիար Ռազէք Մալօն։ Ան աւարտած է Հալէպի գիւղատնտեսական համալսարանը ապա Լիբանանի Քասլիք համալսարանին մէջ մասնագիտացած է Եոկայի մարզարուեստին մէջ։

Բացման խօսքէն ետք ներկաները հետաքրքրութեամբ ունկնդրեցին դասախօսին ներկայացուցած նիւթը։ Անոնք հաւաքաբար գործադրեցին առաջարկուած մարզաձեւերը, որոնք օգտակար էին ողնաշարին, արեան շրջագայութեան, շնչառութեան, ջղային համակարգին եւ մաշկին։

Տիար Մալօ թելադրեց օրական քանի մը վայրկեան տրամադրել մեր մարմնին, կատարել եոկայի վարժութիւններ՝ կարգաւորելու մեր շնչառութիւնը եւ արեան շրջագայութիւնը, ձերբազատելու համար մկանային պրկումներէ եւ ցաւերէ։

Ներկաները մեծ ոգեւորութեամբ հետեւեցան դասախօսութեան եւ առողջապահական գիտելիքներով հարստացած շնորհակալութիւն յայտնեցին կազմակերպիչ յանձնախումբին։

Թղթակից

Share.

Leave A Reply